សម្រាប់ទីផ្សារឡានមួយទឹកបច្ចុប្បន្នហាក់ដាំក្បាលចុះខុសពី ៣ឆ្នាំមុនឆ្ងាយណាស់ ពិសេសឡានមួយទឹកដែលបំពាក់ម៉ាស៊ីនសាំងធំៗ ៦ស៊ីឡាំងឡើងទៅដូចជាពពួក Lexus និង Toyota សុទ្ធតែជាឡានដែលពេញនិយមនៅស្រុកខ្មែរ។

ការធ្លាក់ចុះនេះអាចមកពីកត្ដាសំខាន់ធំៗពីរ ទី១ ទីផ្សារឡានថ្មីដែលមានតម្លៃស្មើឡានមួយទឹកកំពុងវ៉ៃឡុក និងទី២ ឡានមួយទឹកស៊ីសាំងច្រើនព្រោះម៉ាស៊ីនធំ ហើយស្របពេលសាំងឡើងថ្លៃផង ទើបឡានមួយទឹកដែលធ្លាប់ជាខ្លាចាស់ ត្រូវដល់ពេលដកចង្កូមវិញ។

ថ្ងៃនេះ Advan Auto សូមលើកឡើងពីឡានមួយទឹកពេញនិយម ៧ម៉ូឌែលក្នុងតម្លៃ ក្រោម៣ម៉ឺនដុល្លារ (គិតពីឆ្នាំ២០២០ សាំង១លីត្រក្រោម ៣ពាន់រៀល និងបច្ចុប្បន្នលើ ៤ពាន់រៀល) កំពុងដាំក្បាលចុះពេលសាំងឡើងថ្លៃ ខាតទាំងអ្នកលក់ខាតទាំងអ្នកទិញ តែបើសាំងធ្លាកចុះច្រើនបន្ដិច ឡានទាំងនេះនឹងមានសង្ឈឹមវិញហើយ។

១/ Toyota Tacoma ឆ្នាំ២០០៥-២០១២

Tacoma បំពាក់ម៉ាស៊ីន ៦ស៊ីឡាំង មុខកាត់ស៊ីឡាំង ៤.០លីត្រ កម្រិតស៊ីសាំងវិញចេញពីរោងចក្រ កាលជិត២០ឆ្នាំមុន ចន្លោះពី ១១លីត្រ ទៅ ១៣លីត្រក្នុង១០០គីឡូម៉ែត្រ។

បច្ចុប្បន្នបទពិសោធ៍ពីរនាក់ប្រើផ្ទាល់ ក្នុង១០០គីឡូម៉ែត្រ ស៊ីខ្ទង់១៤លីត្រ ១៧លីត្រ ឬអាចលើសនេះ និងប្រែប្រួលទៅតាមស្ថានភាពជាក់ស្ដែង។ ពី៣ឆ្នាំមុន Tacoma នេះឡើងតម្លៃខ្លួនដល់ ១៨០០០ដុល្លារ ទៅ ២៧០០០ដុល្លារជាងឯណោះ។ តែបច្ចុប្បន្ន ធ្លាក់ចុះយ៉ាងខ្លាំងមកនៅត្រឹម ១៤០០០ដុល្លារ ទៅ២២០០០ដុល្លារប៉ុណ្ណោះ។ 

២/ Toyota Tundra ឆ្នាំ២០០៧ ដល់២០១៣

Tundra គឺជាកំពូល Pick Up ដែលមានកម្លាំងខ្លាំងរបស់ Toyota ដោយបំពាក់ម៉ាស៊ីន ៨ស៊ីឡាំង ចំណុះ ៥.៧លីត្រ ស៊ីសាំងក៏ខ្លាំងដែរកាលចេញពីរោងចក្រ ប្រហែល១៥ឆ្នាំ ចន្លោះពី ១៤លីត្រ ទៅ ១៨លីត្រក្នុង ១០០គីឡូម៉ែត្រ តែបច្ចុប្បន្នអាចហក់ដល់ចន្លោះពី ១៦ ទៅ២០លីត្រ ទៅតាមស្ថានភាពផ្លូវ និងការបើកបរជាក់ស្ដែង។

សម្រាប់តម្លៃកាលមុន ២៧០០០ដុល្លារ ដល់ក្បែ៤០០០០ដុល្លារឯណោះ តែបច្ចុប្បន្ននៅត្រឹម ១៧០០០ដុល្លារ ដល់ ក្បែរ ៣០០០០ដុល្លារប៉ុណ្ណោះ។

៣/ Toyota Land Cruiser និង Lexus LX470

SUV  គីឡូធ្ងន់ទាំអពីរម៉ូឌែលនេះ ប្រើម៉ាស៊ីនមានទាំងប្រភេទសាំង ៨ស៊ីឡាំង ចំណែកម៉ាស៊ីនម៉ាស៊ូតទំហំ ៦ស៊ីឡាំង(Land Cruiser)។

និយាយពីកម្រិតស៊ីសាំងវិញ បើជាម៉ាស៊ីនម៉ាស៊ូតចន្លោះ ១៣លីត្រ ទៅ ១៦លីត្រ ចំណែកម៉ាស៊ីនសាំងស៊ីខ្ទង់ ១៥លីត្រ ទៅ១៨លីត្រ ក្នុង១០០គីឡូម៉ែត្រ និងប្រែប្រួលទៅតាមការបើកបរជាក់ស្ដែង។ 

ចំពោះតម្លៃប្រហាក់ប្រហែលគ្នាកាលមុន ចន្លោះពី ២ម៉ឺនដុល្លារ ទៅ ៣ម៉ឺនដុល្លារជាង តែបច្ចុប្បន្នដូចស្ងាតបាត់ឈ្មោះបោះសម្លេងធ្លាក់មកត្រឹម ១ម៉ឺនដុល្លារជាង ទៅ ២ម៉ឺនដុល្លារប៉ុណ្ណោះ(LX470 រាងធ្លាក់ជាងបន្ដិច)។

៤/ Lexus RX300 និង Lexus RX330

ពពួក RX នេះសុទ្ធជាឡានដែលចាយរាងរបស់ Lexus ជាពិសេសគឺចាប់ពី RX330 នឹងតែម្ដង។ តែចំពោះ RX300 មួយរយៈនេះដូចជាស្ងាត់ហៅលែងឮទៅហើយ ព្រោះតែស៊ីសាំងច្រើនគួរសម ណាមួយក៏ធ្លាក់ប្រជាប្រិយ៍ភាពខ្លាំងណស់ដែរ។

RX300 ប្រើម៉ាស៊ីនសាំងទំហំ ៦ស៊ីឡាំងចំណុះ ៣.០លីត្រ ចំណែក RX330 ប្រើម៉ាស៊ីន ៣.៣លីត្រ ចំពោះកម្រិតស៊ីសាំងប្រហាក់ប្រហែលគ្នាចន្លោះពី ១៣លីត្រ ទៅ ១៦លីត្រក្នុង១០០គីឡូម៉ែត្រ។ 

ចំពោះតម្លៃ RX300 (ឆ្នាំ០១-០៣) ពីមុនចន្លោះ ១៨០០០ដុល្លារ ទៅ ២៥០០០ដុល្លារ បច្ចុប្បន្នមកត្រឹម ១១០០០ដុល្លារ ទៅ ១៨០០០ដុល្លារប៉ុណ្ណោះ បើឆ្នាំ២០០០ចុះក្រោមចន្លោះពី ៧០០០ដុល្លារ ទៅ ៩០០០ដុល្លារ។

ចំណែក RX330 តម្លៃពីមុនខ្ពស់ខ្លាំងណាស់ខ្ទង់ ៣ម៉ឺនដុល្លារ ទៅក្បែរ ៤ម៉ឺនដុល្លារឯណោះ តែបច្ចុប្បន្នពពួកឡានដែលស៊ីសាំងខ្លាំងបែបហ្នឹងធ្លាក់មកត្រឹមក្បែរ ២ម៉ឺនដុល្លារ ទៅ ៣ម៉ឺនដុល្លារប៉ុណ្ណោះ។

៥/ Toyota Highlander ឆ្នាំ២០០១ ដល់២០០៦

Highlander បច្ចុប្បន្នក៏វាសនាមិនខុសពី Lexus ត្រកូល RX ឡើយ ព្រោះប្រើម៉ាស៊ីនដូចគ្នា (V6) កម្រិតស៊ីសាំងក៏មិនខុសគ្នាឆ្ងាយប៉ុន្មានដែរ។ សម្រាប់តម្លៃធ្លាក់ច្រើន តែយ៉ាងណាក៏នៅលើ RX300 ចន្លោះពី ១១០០០ដុល្លារ ទៅ ២២០០០ដុល្លារ ដែលកាលពីមុនហក់ដល់ ១៧០០០ដុល្លារ ទៅ ២៥០០០០ដុល្លារឯណោះ។

និយាយរួមឡានមួយទឹកទាំង ៧ម៉ូឌែលនេះ សុទ្ធតែជាឡានដែលរត់ស្រួលជើងក្រោមហាប់ណែន ការបើកបរក៏នឹងល្អមិនចាញ់ឡានស៊េរីឡើយ គ្រាន់តែស៊ីសាំងខ្លាំងប៉ុណ្ណោះ។ ហើយពពួកឡានទាំងនេះតែងតែផ្ញើរវាសនាខ្លួនទៅនឹងតម្លៃសាំង បើកាលណាសាំងឡើងថ្លៃ ឡានទាំងនេះក៏ចាប់ផ្ដើមធ្លាក់ថ្លៃភ្លាមៗ តែបើសាំងចុះក្រោម ៣ពាន់រៀលដូចពីមុន ឡានមួយទឹកទាំង ៧ម៉ូឌែលនេះរីកមុខមាត់សម្បើមណាស់ ហើយតម្លៃក៏នឹងល្អគួរសមដែរ (បច្ចុប្បន្នប្រសិនសាំងចុះថោក ឡានទាំងនេះឡើងថ្លៃក៏មិនលើស៣ពាន់ដុល្លារដែរ)។

សរុបមក ការលើកឡើងទាំងនេះ គ្រាន់តែចង់ឲ្យបងប្អូនពិចារណាសិនប៉ុណ្ណោះ ព្រោះទីផ្សារឡានមួយទឹកពពួកឡានស៊ីសាំងខ្លាំងបែបនេះ មិននឹងនរឡើយពេលទិញក៏ខាត លក់វិញក៏ខាតច្រើន ។ សម្រាប់បច្ចុប្បន្ននេះបើអាច ពិចារណាឡានមួយទឹកផ្សេងដែលប្រើម៉ាស៊ីនតូចល្មមដើម្បីសន្សំសំចៃសិនបាន ណាមួយលក់វិញក៏មិនជាខាតច្រើនប៉ុន្មានដែរ។

ចុះបងប្អូនវិញយល់យ៉ាងណាដែរចំពោះ ការលើកឡើងពីឡាន ៧ម៉ូឌែលនេះ? សម្រាប់មតិយោបល់ និងបទពិសោធន៍ អាចចែករំលែកបន្ថែមបាន៕

ដោយ៖ Bunsak

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ។

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!