និយាយចំពោះឡាន Toyota នៅស្រុកខ្មែរសម្បូរអ្នកប្រើណាស់ អាចនិយាយបានថាឈរលើលេខរៀងលំដាប់ទីមួយហើយ។ តែចំពោះសេរ៊ីម៉ូឌែលដូចជាពពួក Vios វិញហាក់មិនមានភាពពេញនិយម ទោះបីជាឆ្នាំខ្ពស់សន្សំសំចៃក៏ដោយ។ ជាក់ស្ដែង Toyota Vios ជារថយន្ដនិយមប្រើនៅអាស៊ី ដូចជានៅថៃជាដើម ហើយក៏ជាប្រទេសដែលតម្លើង និងនាំចេញនៅ Vios នេះដែរ។

ចំពោះស្រុកខ្មែរឃើញមានប្រើតិចតួចដែរ សម្រាប់សេរ៊ីឆ្នាំ២០១៤ ដល់ ២០១៧ ក្នុងនោះដែរចាប់ពីឆ្នាំ០១៧ឡើង Toyota បានផ្លាស់ប្ដូររូបរាងខាងក្រៅ ម៉ាស៊ីន និងខាងក្នុងបន្ថែមទៀត ទៅលើ Vios ហើយតម្លៃក៏រាងខ្ពស់ទៅតាមហ្នឹងដែរ។

ថ្ងៃនេះ​ Advan Auto និងលើកយកនៅឆ្នាំ០១៤ និង ០១៦ ដែលតម្លៃនៅស្រុកខ្មែរស្លាកលេខ បងប្អូនអាចរកទិញបានចន្លោះពី ១៧០០០ដុល្លារជាង ទៅជិត២០០០០ដុល្លារ អាស្រ័យលើកឆ្នាំផលិត Option ពណ៌ និងភិនភាគជាក់ស្ដែងជាងដើម។

- Vios ប្រើម៉ាស៊ីន ៤ស៊ីឡាំង ចំណុះ ១.៥លីត្រ ផលិតកម្លាំងបាន ១០៨សេះ កម្លាំងរមួល ១៤០ញ៉ូតុន័មែត្រ រត់ដោយប្រអប់លេខ ៤វគ្កអូតូ បង្វិលកង់ដោយប៉ុងមុខ (FWD) ល្បឿនអតិបរិមា ១៨០គីឡូម៉ែត្រ/ម៉ោង ជាន់ស្ទុះពី ០ ទៅ ១០០គីឡូម៉ែត្រ ប្រើពេល ១២វិនាទី។ កម្រិតស៊ីសាំងជាមធ្យម ៦លីត្រ ទៅ៨លីត្រ ក្នុង១០០គីឡូម៉ែត្រ។

-ជើងក្រោម Vios ដំណើរការដោយប្រព័ន្ធឯករាជ អមជាមួយនិង បូមរឺស័រ MacPherson Strut នៅផ្នែកខាងមុខ និងខាងក្រោយជាប្រភេទ Torsion Beam។ ចំណែកយាន់កង់វិញទំហំ ១៥អីញ ប្រើហ្វ្រាំងឌីសគៀប នៅផ្នែកខាងមុខ និងខាងក្រោយជាហ្វ្រាំងត្រលោគ ជំនួយដោយប្រព័ន្ធ ABS និង BA ផងដែរ។

-ខាងក្រៅបើមើលមិនចាប់អារម្មណ៍ខ្លាំងទេ Vios អាចច្រឡំជាមួយនិង Corolla ឆ្នាំ០១៤ដែរ តែមិនពិសេសទំនើបដូចឡើយ។ ជាក់ស្ដែង Vios ប្រើចង្កៀងទាំងមុខក្រោយធម្មតាជាប្រភេទ Halogen អមដោយពិលកាងមួយគូ តែមើលទៅស្អាតប្លែកគ្រាន់បើ អាចនិយាយបានថាទោះមិនទំនើប តែរូបរាង Vios ចូលចំណោមគេបាន។ 

-​​​ ខាងក្នុងដូចជាមិនមានអ្វីប្លែកទេ ជាប្រភេទឡាន Sedan ទ្វា៤ កៅអីធម្មតា ២ជួរ មិនមានជំនួយដោយអេឡិចត្រនិកឡើយ បើប៉ះ Option ខ្លះមាននៅកៅអីស្បែក អេក្រង់ធំ Display មិនមាន Sensor ឬកាម៉េរាក្រោយឡើយ ទាល់តែឆ្នាំ២០១៧ឡើង ទើបToyota បំពាក់នៅមុខងារមួយចំនួនបន្ថែមទៀត។Vios មិនទូលាយ ហើយក៏មិនចង្អៀតពេកទេ ល្មមសម្រាប់ជិះគ្នា៥នាក់ និងសល់ឃ្លុបក្រោយអាចដាក់ ឥវ៉ានបានច្រើនគួរសម។

- សរុបមកចំពោះ Toyota Vios ទោះបីជាឆ្នាំរាងខ្ពស់បន្ដិចក្ដី តែមិនមានអ្វីថ្មីប្លែកឡើយ តែបើនិយាយពីរូបរាង ចំពោះឡានតម្លៃប្រហាក់ប្រហែលគ្នា Vios ស៊ីដាច់ហើយ។

- ជារួមបើតាមបទពិសោធន៍ពីអ្នកប្រើប្រាស់ គឺថាធន់សន្សំសំចៃដូ​ច Corolla អញ្ចឹង គ្រាន់តែទីផ្សារនៃការប្រើប្រាស់មិនសូវទូលាយ ដូច្នេះហើយពេលលក់ចេញវិញរាងតឹងបន្ដិច ណាមួយគ្រឿងបន្លាស់ក៏មិនសូវសម្បូរដែរ។

ចុះបងប្អូនយល់យ៉ាងណាចំពោះឡាន ឆ្នាំខ្ពស់តម្លៃធូរ ប្រើធន់សន្សំសំចៃ បំពាក់គ្រឿងធម្មតាៗ តែចាយរាងដូចម៉ូឌែល Toyota Vios នេះ?

អត្ថបទ៖ BunSak