ថ្វីត្បិតតែ ឆ្នាំនេះ Toyota នៅចិន (GAC Toyota) បានប្រកាសកាត់បន្ថយចំនួនបុគ្គលិកជាង ១០០០ នាក់ដោយសារតែទិន្នន័យការលក់ក្នុងទីផ្សារចិនមិនសូវអំណោយផល តែមិនមែនមានន័យថា កម្រិតការលក់របស់ខ្លួនក្នុងទីផ្សារផ្សេងៗអន់នោះទេ​ ដោយថ្មីៗនេះ តាមការចុះផ្សាយពី Rueters បានឲ្យដឹងថា ទិន្នន័យការលក់រថយន្ដរបស់ Toyota សម្រាប់ទីផ្សារពិភពលោក កំពុងតែហក់ឡើងគួរឲ្យកត់សម្គាល់ពោល គឺ​ ៥.១% ក្នុងឆមាសទី ១ នៃឆ្នាំ ២០២៣ នេះ បើប្រៀបនឹងរយៈពេលដូចគ្នាកាលពីឆ្នាំមុន ដែលស្មើប្រមាណ ៤.៩ លានគ្រឿង ធៀបនឹង ៤.៧ លានគ្រឿងនៅឆ្នាំ ២០២២។

ក្នុងនោះដែរ ទីផ្សរដែលមានតម្រូវការច្រើនជាងគេ មានដូចជា ជប៉ុន ដែលកើនឡើង ៣៣.២% និងអាមេរិក ០.៧% ហើយបើគិតតែក្នុងខែមិថុនា នេះ ធៀបនឹងនឹងឆ្នាំមុន ការលក់កើនឡើង ១០%​ ដែលក្នុងនោះឡានហាយប្រីត និងអគ្គិសនីមានចំនួនច្រើនជាងគេ ដោយហាយប្រីតកើនឡើង ៣៧.៦% ធៀបនឹងរយៈពេលមុនឬប្រមាណ ២៩២ ១​៣១ គ្រឿង និងឡានអគ្គិសនីកើនឡើង ៤៦ ១៧១ គ្រឿងសម្រាប់ទីផ្សារទូទៅ។ 

Toyota បានឲ្យដឹងដែរថា ការកើនឡើងកម្រិតការលក់នេះ បណ្ដាលមកពីការកើនឡើងវិញនូវសង្វាក់ផលិតកម្ម ការផលិត គ្រឿងបង្កុំ បន្ទះឈីប នឹងបរិក្ខាររថយន្ដផ្សេងៗ ដែលធ្វើឲ្យការផលិតលែងយឺតយ៉ាវ និងស្របតម្រូវការរបស់អតិថិជនបានទាន់ពេលវេលា ក្នុងនោះដែរ បន្ទាប់ពី Toyota ចាប់ផ្ដើមផ្ដោតលើការផលិតឡានអគ្គិសនី និងឡានហាយប្រីត មក ឃើញថា មានតម្រូវការពីអតិថិជនកើនឡើងជាពិសេសក្នុងទីផ្សារអាមេរិក និងអឺរ៉ុប។   

គួរបញ្ជាក់ដែរថា កាលពីដើមឆ្នាំនេះ Toyota ក៏បានប្រកាសផែនការបង្កើនការផលិតឡានអគ្គិសនីឲ្យបាន ៣០ ម៉ូដែលនៅឆ្នាំ ២០៣០ និងផលិតបន្ដបន្ទាប់ទៀត ជាមួយការប្រើប្រាស់បច្ចេកវិទ្យាថ្មី ទាំងថ្ម និងបរិក្ខារ ឲ្យមានលក្ខណៈប្រសើរជាងមុន និងមានតម្លៃសមរម្យ ដើម្បីមកដណ្ដើមទីផ្សារ និងក្លាយខ្លួនជាក្រុមហ៊ុនលក់រថយន្ដធំជាងគេឡើងវិញផងដែរ។

ប្រភព៖ Rueters 

អត្ថបទ៖ Andra 

លោកអ្នកអាចចូលទៅទស្សនាវីដេអូអំពីរថយន្តជាច្រើនទៀតនៅលើ YouTube Channel Advan Auto 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!