ក្រុមហ៊ុន Ford បានបញ្ចេញម៉ូឌែល Pick Up ថ្មី្មមួយទៀតត្រកូល Ranger ជំនាន់ទីមួយនៅឆ្នាំ១៩៨២ ដែលពាក់កណ្ដាល ២០២២ នេះ ដល់ជំនាន់ទី ៥ ទៅហើយ។ តែក្នុងមួយជំនាន់ៗ Ford ធ្វើការប្រែរូបរាងក៏ដូចជាមុខងាមួយចំនួនរហូតដល់ ៥ ទៅ ៦ ដងក៏មានដែរ ដូចជាជំនាន់ទី៣(១៩៩៨ ដល់ ២០១៨) ជាដើម Ford​ Ranger បានកែប្រែទម្រង់មិនតិចជាង ៦ ដងឡើយ។

 សន្ទុះនៃការប្រើប្រាស់រថយន្ដ Ford Ranger  នៅកម្ពុជាមានការកើនឡើងខ្លាំងមែនទែន ចាប់ពី២០១៦​ កំណែទម្រងលើកទី ៦ បីឆ្នាំចុងក្រោយ(២០១៦-២០១៨)នៃជំនាន់ទី៣ ធ្វើការផ្លាស់ប្ដូរ រាងខាងក្រៅ ចង្កៀង ប៉ាណា និងខាងក្នុង កៅអី តាបឡូ ប្រពន្ធ័បច្ចេកវិទ្យាថ្មីទាំងស្រុង ដែលធ្វើអោយរថយន្ដ Pick Up​​​ មួយនេះជោគជ័យកើបលុយសម្បើមណាស់ ជុំវិញពិភពលោក ក៏ដូចជានៅកម្ពុជាជាដើម។

គួរបញ្ជាក់ដែរថា នៅស្រុកខ្មែរ Ranger ដាក់លក់តែ ៥ ម៉ូឌែលប៉ុណ្ណោះដូចជា៖ XL, XLS, XLT,​​ Wildtrak, និង Raptor

ហើយអ្វីដែល Advan Auto ចង់និយាយថ្ងៃនេះគឺ អាបងធំទី២ Ranger Wildtrak ជំនាន់ទី៤ (ឆ្នាំ២០១៩ ដល់២០២២) នេះឯង ទាំងរូបរាង និងបរិក្ខាខាងក្នុងផ្សំគ្រឿងអ្វីពិសេសខ្លះ បានជានៅស្រុកខ្មែរសម្បូគេជិះម្លេះ។

វាប្រើម៉ាស៊ូត កម្រិតស៊ីប្រេងជាមធ្យមប្រមាណជា ៨.៥ លីត្រ ដោយក្នុងក្រុង ៩.៨ លីត្រ និងក្រៅក្នុង៧.៥លីត្រក្នុងមួយ ១០០ គីឡូម៉ែត្រ ចាក់មួយពេញបាន ៨០លីត្រ រត់បានប្រមាណជា ៩៥២ គីឡូម៉ែត្រ។

 ប្រព័ន្ធជើងក្រោមកែប្រែតិចតួចមិនខុសប្លែកច្រើនទេ យ៉ានកង់ទំហំ ១៨ អីញ ជាមួយនិងហ្វ្រាំងគៀបពីមុខ ហ្វ្រាំងតាំប៉ួពីក្រោយ ជំនួយដោយ ABS ខាងមុខបំពាក់ បូមរឺស៊រ (MacPherson Strut) ជាមួយស្លាបប្រជៀវឌុប(Double Wishbone) ខាងក្រោយប្រើជាជន្ទៀស ជំនួយដោយបូមដែលប្រើប្រេង(Hydraulic double acting shock absorber) វាជួយកាត់បន្ថយបានច្រើនពីការលាក់ សម្លេងរំខានពីខាងក្រៅ និងមានភាពរឹងមាំងជាងមុន។

វាមានទំហំប្រវែង ៥៣៨៩ម.ម ទទឹង ១៨៥០ម.ម កម្ពស់ ១៨៤៨ម.ម កម្ពស់ពីដីមកបាត ២៣២ម.ម ទ្រុងក្រោយប្រវែង ១៥៥០ ម.ម ទម្ងន់ ២២៦០គីឡូក្រាម ដឹកបានជិត ១០០០គីឡូ និងអាចសណ្ដោងបាន ៣៥០០គីឡូបន្ថែមទៀត។

បើនិយាយពីការផ្លាស់ប្ដូរវិញ ផ្នែកខាងក្រៅ វាមានប៉ាណាប្លែកពីឆ្នាំចាស់ទាំងស្រុង​ស្រោបដោយក្រូម បន្ថែមសែនស៊រ ២គ្រាប់ទៀត ចង្គៀងគុជ HID ច្បាស់ល្អជាមួយនឹង Daytime running light និងពិលកាងរាងជ្រុងប្រភេទ LED​ ដាច់ចេញពីប៊រឌាកាងខាងមុខ។ ស្ដុបក្រោយប្រើ LED តែមអក្សររាងឌិតធំៗជាងមុននិងរនាំងគូទខាងក្រោយ កែប្រែបានល្អដោយ ប្រើសោរចាក់ និងប្រភេទរឺស៊រងាយស្រួលបើកបិទ ទោះអ្នកប្រើដៃអស់កម្លាំង ក៏អាចលើកទាញបាន។

ខាងក្នុងវិញអ្វីដែលប្លែកក្នុងប្រវត្តិសាស្រ្ត Ford បានបំពាក់ Smart Key ពីរគ្រាប់ មានប៉ូតុង Power Start  ឲ្យបងធំទីពីនេះកាន់តែមានសម្រស់ជាងមុន  កុំអោយចាញ់អាព្រូស ០៤។ ជាមួយនិងអេក្រង់ថាច់ ៨ អីញ អាចភ្ជាប់ជាមួយនិង Android Auto និង Apple Carplay ។ ជារួមខាងក្នុងប្រណិតជាងឆ្នាំចាស់គ្រាន់បើ កៅអី តាបឡូស្បែកសុទ្ធលក្ខណៈ Priumerm និងផ្នែកខ្លះៗទៀតដូចជា កុងទ័រស្ក្រីន LED  និងប៉ូតុងសារ៉េភ្លើងខ្ពស់ទាបជាដើម។ 

ចំពោះប្រពន្ធ័សុវត្ថិភាព បច្ចេកវិទ្យាដែល Ford បំពាក់បន្ថែមអោយកាន់តែទំនើបជាងឆ្នាំមុននៅ Ranger Wildtrak ឆ្នាំ ២០១៩ នេះរួមមាន៖

• Parallel Parking Assist  ជំនួយពេលចូលចតដោយស្វ័យប្រវត្តិ
• Pre-collision Assist with Autonomous Emergency Braking ជាប្រពន្ធ័ផ្ដល់សញ្ញាគ្រោះថ្នាក់ ការពារការបុកប៉ះ និងចាប់ហ្វ្រាំងដោយស្វាយប្រវត្តិ
• Driver Alert ប្រពន្ធ័ផ្ដល់ដំណឹងឲ្យអ្នកបើកបរឈប់សម្រាក
•  Lane Keeping Alert  ផ្ដល់សញ្ញាពេលបើកបរខុសកន្លង
• Adaptive Cross Control​ រាដាចាប់ល្បឿនគំលាតសុវត្ថិភាព ពីឡានខាងមុខ
• Hill Descent Control ប្រពន្ធ័ជំនួយពេលចុះចំណោត
• Hill Launch Assist ទប់រយថន្ដមិនឲ្យថយក្រោយពេលឡើងចំណោត 
• Electronic Stability Program (ESP) ប្រពន្ធ័ទប់លំណឹងពេលផ្លូវកោង រអិលខ្លាំងមិនអោយរថយន្ដក្រលែង ផ្អៀង ឬក្រឡាប់។ ចំពោះតេស្ដប៉ុកប៉ះវិញ Wildtrak ទទួលបានផ្កាយ៥ ពេញតែម្តង ។

សរុបមកទំនើបដែរតើ ខាងក្នុងក៏ស្អាតទូលាយ រូបរាងអាចទទួលយកបាន សម្ថភាពជើងក្រោមក៏អេមគួរសម សម្រាប់បងប្អូនដែលចង់ប្រើប្រាស់ Ford ២០២២ ឬ២០២៣ តែអត់មានថវិកាគ្រប់ Ranger ២០១៩ នេះក៏មិនអន់ដែរ

មានចន្លោះពី ៣០០០០ដុល្លារក្រាស ទៅ ៤០០០០ ដុល្លារស្ដើង អាចពិចារណាបាន។

ហើយថ្លៃចំណាយពេលជួលជុលរាងថ្លៃគួសមដែរខ្ទង់ ២០០ ដុល្លារទៅ ៦០០ ដុល្លារជាង តាមកម្រិតជាក់ស្ដែង។

អត្ថបទ៖ BunSak