និយាយពីរឿងកាន់លុយខ្ទង់ ៨០០០ដុល្លារ ដល់១០០០០ដុល្លារ យកទៅទិញឡាន ក្នុងឆ្នាំ ២០២២នេះ ប្រហែលជា ពិបាកបន្ដិច មិនដឹងថាទិញឡានអ្វី ប្រសិនបើបងប្អូនមិនសូវជាដឹងច្បាស់ ទាក់ទងនឹងហាងឆេងទីផ្សារឡាននោះទេ។

ថ្ងៃនេះកម្មវិធីបទបង្ហាញរថយន្ដមួយទឹក របស់ Advan Auto នឹងលើកយក រថយន្ដស្លាកលេខ ៤ម៉ូឌែល កំពុងពេញនិយមខ្លាំង​នៅស្រុកខ្មែរ។ តម្លៃគួរសម ធន់ សុីសាំងតិច គុណភាពអាចទទួលយកបាន សម្បូរគ្រឿងបន្លាស់ បើទិញប៉ះឡានស្អាត ហើយប្រើថែទៀត លក់វិញមិនសូវជាខាតច្រើនឡើយ។

១. Toyota Prius 04-05

អាព្រូស បំពាក់ម៉ាស៊ីន ៤ ស៊ីឡាំង ចំណុះ ១.៥​ លីត្រ ជំនួយដោយម៉ូទ័រ ១ គ្រាប់  សរុបកម្លាំងទាំងម៉ាស៊ីននិងម៉ូទ័រ ផលិតបាន ១១០ សេះ  ដែលអាចជាន់ស្ទុះពី ០-១០០ km/h ប្រើរយៈពេល ១០.៤ វិនាទី ជាមួយនឹងល្បឿនលឿនបំផុតអាចជាន់បាន ១៧០ km/h ។

ចំពោះកម្រិតស៊ីសាំងវិញ​ វាស៊ីត្រឹមតែ​ ៥​ លីត្រ/១០០km ជាមធ្យម និងក្រៅក្រុង​ ៥.២​ លីត្រ/១០០គ.ម ឬអាចលើសនេះបើសិនយើងជាន់ល្បឿន ប្រើកម្លាំងម៉ាស៊ីនច្រើន ។ វាដំណើការពាក់កណ្ដាលអាគុយ និងពាក់កណ្ដាលម៉ាស៊ីន ពេលដែលស្ទះ ឬជាន់ហ្វ្រាំងញឹកញាប់ វាប្រើកម្លាំងអាគុយដើម្បីបង្វិលកង់ ល្អសម្រាប់ប្រើប្រាស់ក្នុងទីក្រុង។

សម្រាប់ឆ្នាំផលិត ២០០៤ ឡើង ភ្ជាប់មកជាមួយប៉ូតុង Power Start/Stop និង Smart Key 3 គ្រាប់ (សម្រាប់ Prius ២០០៤ ផលិតចុងឆ្នាំ ២០០៣ មិនមាន Smart Key ទេ ត្រូវការដោតសោរដើម្បីបញ្ជេះ) ។ វាបំពាក់យ៉ាន់កង់ ១៥ អីញ ដោយហ្រ្វាំងឌីស (Disk Brake) នៅខាងមុខ និងហ្រ្វាំងតាំបួរ(Drum Brake) នៅខាងក្រោយ ជំនួយដោយប្រព័ន្ធ ABS ការពារការគៀបហ្រ្វាំង។

តម្លៃស្លាកលេខ ចន្លោះពី ៩០០០ដុល្លារជាង ទៅ១០០០០ដុល្លារជាង អាស្រ័យតាម ពណ៌ Option ជាដើម។

២.Toyota Camry 02

Camry 02 ឬ បាឡែនបំពាក់ម៉ាស៊ីន ៤ ស៊ីឡាំង មុខកាត់ ២.៤ លីត្រ ផលិតកម្លាំង ១៥៧ សេះ កម្លាំងរមួល ១៦២ ផោនហ្វីត ប្រើប្រអប់លេខ ៤ វគ្គអូតូ​ រត់ដោយប៉ុងមុខ (FWD) បំពាក់យ៉ាន់កង់​ទំហំ១៦អីញ មានហ្វ្រាំងឌីស (Disk) ទាំងមុខទាំងក្រោយ ជំនួយដោយ​ប្រព័ន្ធ ABS។ ល្បឿនអតិបរិមា ១៩៨ km/h ជាន់ស្ទុះពី ០-១០០ km/h ប្រើពេល ៩.៤ វិនាទី។

កម្រិតស៊ីសាំង ក្នុងក្រុងច្រើនគួរសម ១០ លីត្រ/១០០គ.ម និងក្រៅក្រុងផ្លូវលាត ៧ លីត្រ/១០០គ.ម ។

បាឡែនជាឡាន Sedan ទ្វា ៤​ ខាងក្នុងទូលាយគួរសម ជិះគ្នា ៥ ទៅ ៦ នាក់ និងមានឃ្លុបក្រោយសម្រាប់ដាក់ឥវ៉ានបានច្រើនគួរសម។ ចង្កូតវាធូរស្រួលបត់បែន ផ្នែកខ្លះស្រោបដោយហ្វរមីកាឈើ និងមុខងាមួយចំនួន បញ្ជារដោយប៉ូតុងចុចជាដើម។

តម្លៃស្លាកលេខខ្ទង់ ៩០០០ ដុល្លារក្រាស់ ទៅ ១០០០០ដុល្លារជាង អាស្រ័យ លើ Option ពណ៌ និងគុណភាពជាក់ស្ដែង។

៣. Toyota Corolla 03

Toyota បំពាក់ម៉ាស៊ីន ៤ ស៊ីឡាំងឲ្យ Corolla ចំណុះ ១.៨ លីត្រ ផលិតកម្លាំង ១៣០សេះ កម្លាំងរមួល ១២៥ ផោនហ្វីត ប្រើប្រអប់លេខ ៤ វគ្គអូតូ និងបង្វិលកង់ដោយប៉ុងមុខ (FWD) ប្រើយ៉ាន់កង់ ១៥អីញ ហ្វ្រាំងឌីសគៀប ផ្នែកខាងមុខ និងខាងក្រោយប្រភេទហ្វ្រាំងស្គរ ជំនួយដោយ ABS។ បើកលឿនបំផុតបាន ១៨៦ គីឡូម៉ែត្រ/ម៉ោង ដែលជាន់ស្ទុះពី ០ ទៅ ១០០ គីឡូម៉ែត្រ សុីពេល ១០.៥ វិនាទី។

កម្រិតស៊ីសាំងវិញ ក្នុងក្រុង ៨ លីត្រ និងក្រៅក្រុងផ្លូវលាតស៊ី ៦ លីត្រ/១០០ គ.ម។

វាជាប្រភេទ Sedan ទ្វា ៤ កៅអី ២ជួរ ជិះគ្នា៤ ទៅ ៥ នាក់ដែរ តែបើធៀបនិង Camry ឆ្នាំដូចគ្នា Corolla មិនទូលាយឡើយ ដោយសារ Toyota កំណត់សមត្ថភាពឲ្យ Corolla នៅលំដាប់ក្រោមគេជានិច្ច ។

តម្លៃបច្ចុប្បន្នទិញផ្លាកលេខ ចាប់ពី ៨០០០ ដុល្លារជាង ដល់ ១០០០០ដុល្លារជាង អាស្រ័យលើភិនភាគជាក់ស្ដែង។

៤.Toyota Rav4 01-02

RAV4 បំពាក់នៅម៉ាស៊ិន ៤ស៊ីឡាំង​ មុខកាត់ស៊ីឡាំង ២.០លីត្រ ផលិតកម្លាំងបាន ១៤៨ សេះ ល្បឿនលឿនបំផុត​ ១៨៥km/h ជាន់ស្ទុះពី ០-១០០km/h ស៊ីពេល ១០.៦វិនាទី ប្រើប្រអប់លេខ៤ វគ្គអូតូ បង្វិលកង់ដោយប៉ុងមុខ(FWD) និងមានជម្រើសប៉ុងពីរ(4WD) ជំនួយដោយលេខកាប់ពីតាស ។

កម្រិតស៊ីសាំង ​ជាមធ្យម ១០L ក្នុងក្រុង ១១ L, ក្រៅក្រុង ៩L និងបង់ពន្ធផ្លូវត្រឹមតែ ១០ម៉ឺនរៀលប៉ុណ្ណោះតែប៉ុណ្ណោះសម្រាប់ SUV ខ្នាតតូចមួយនេះ។

ចូលក្នុងឡានយើងឃើញកៅអី ២ជួរប្រភេទធម្មតា ជិះគ្នាបាន ៥នាក់ ឃ្លុបខាងក្រោយទូលាយល្មមសម្រាប់ដាក់ឥវ៉ាន់បានច្រើនគួរសម។

តម្លៃបច្ចុប្បន្នចន្លោះពីរ ៨០០០ដុល្លារក្រាស់ ទៅ១០០០០ដុល្លារជាង ផ្អែកលើសាចឈាមឡានជាក់ស្ដែង។

ជារួមទាំង ៤ម៉ូឌែលនេះ ជាប្រភេទឡានដែល កំពុងពេញនិយម ធន់គ្រាន់បើ សុីសាំងតិចគួរសម តម្លៃជួសជុលក៏រាងធូរ ហើយសម្បូរគ្រឿងបន្លាស់ទៀត។ តែពេលទិញកុំភ្លេច ឆែកមើលម៉ាស៊ីន និងប្រអប់លេខផង ម្យ៉ាងទៀតអាយុកាលរបស់វា ជិត២០ឆ្នាំហើយដែរ ដូច្នេះអាចស្ទើតិចតួច ខ្វះមុខខ្វះក្រោយ តែបើប៉ះឡានស្អាត នៅប្រើបាន អត់មានបញ្ហាឡើយ លក់វិញក៏សូវជាខាតច្រើនដែរ៕

អត្ថបទ៖ BunSak