ក្រុមហ៊ុនយក្ស Hyundai របស់ប្រភេទកូរ៉េ បានបញ្ជេញរថយន្ដ ម៉ូឌែល Grand Starex ប្រភេទ minivan នេះឡើងក្នុងឆ្នាំ ១៩៩៧ ដល់ ២០០៧ ដែលចាត់ទុកជាជំនាន់ទី១។

បន្ទប់ពីទទួលបានជោគជ័យខ្លាំង ក៏បានបញ្ចេញជំនាន់ទី២ ក្នុងឆ្នាំ ២០០៨ ដល់បច្ចុប្បន្ន ដែល Advan Auto និងលើកយកមកនិយាយ ក្នុងកម្មវិធីបទបង្ហាញឡានមួយទឹក ដើម្បីអោយបងប្អូនបានដឹងខ្លះៗ ដែលស្រុកខ្មែរមានការនិយម ខ្លាំងណាស់ដែរ ក្នុងរយៈពេលជិត ១០ឆ្នាំកន្លងមកនេះ។

វាមានប្រវែង ៥១៥០ម.ម ទទឹង ១៩២០ម.ម កម្ពស់ ១៩២៥ម.ម ពីដីមកបាត ១៩០ម.ម នឹងទម្ងន់ ២២៦៥គីឡូក្រាម។

ជាប្រភេទឡានវែង មានទ្វា៥ ១២កៅអី អាចជិះបាន១២នាក់ ឬច្រើនជាងនេះសម្រាប់ នៅស្រុកខ្មែរឲ្យតែ អង្គុយបាន ម្យ៉ាងទៀតកៅអីខាងក្រោយធំទូលាយ អាចសារ៉េ មុខក្រោយ នឹងបត់បែនបាន គួបផ្សំនឹងរន្ធម៉ាស៊ីនត្រជាក់ ១០ប្រឡោះថែមទៀត ត្រជាក់មិនចាញ់ថ្ងៃឡើយ។

ចំពោះ Option ដែលខ្មែរយើងនាំចូលមានពីរ គឺ CVX, HVX បើជាប្រភេទ HVX Full Option វិញ៖ ផ្ទៃខាងក្នុងមានភាពលឿងស្រស់ មានកៅអីកម្តៅ និងចង្កូត ពួកស្រោបដោយស្បែក។ ចង្អៀងមុខអូតូ, Sensor ផ្លឹតទឹក ដំណើរការដោយស្វ័យប្រវត្តិ, កញ្ចក់ក្ដោប ពិលកាង ប៊ូតុងបញ្ជារលើចង្កូត អាចបញ្ជាមុខងារមួយចំនួន នឹងភ្ជាប់ Bluetooth បាន។ វាមានដំបូលបើកពីតង់ សម្រាប់ខាងមុខ និងអ្នកដំណើរ, មានកញ្ចក់តូចពីរសងខាង អាចបើកបាន, ក្រៅពីនេះវាមានសេនស័រជំនួយពេលចូលចត ជាដើម។

ចំពោះម៉ាស៊ីននៅស្រុកខ្មែរភាគច្រើន នាំចូលប្រភេទម៉ាស៊ីន ៤ស៊ីឡាំង ចំណុះ២.៥លីត្រ ជំនួយដោយ Turbocharge ផលិតកម្លាំងបាន ១៧៥សេះ កម្លាំងរមួល ២៩៦ផោនហ្វីត រត់ដោយប្រអប់លេខ ៥វគ្គអូតូ បំពាក់យ៉ាន់កង់១៧អីញ(សម្រាប់​HVX) ហ្វ្រាំងឌីសគៀមមុខក្រោយ ជំនួយដោយ ABS ល្បឿនអតិបរិមា ២២០គីឡូម៉ែត្រ/ម៉ោង ជាន់ស្ទុះពី ០-១០០គីឡូម៉ែត្រ ប្រើពេល ១១.៩វិនាទី។ និយាយពីកម្រិតស៊ីប្រេងម៉ាសូត ជាមធ្យម ចន្លោះពី ៨លីត្រ ទៅ១០លីត្រ ក្នុង១០០គីឡូម៉ែត្រ។

ប្រព័ន្ធជើងក្រោម ប្រើជាមួយនឹង ប៉ូមរឺស័រ MacPherson Strut Coil Spring នៅផ្នែកខាងមុខ នឹងខាងក្រោយជាប្រភេទ Rigid Axle Suspension ដែលជាប្រភេទជើងក្រោមមិនឯករាជ្រ ជំនួយដោយបូមនិងរឺស័រធម្មតា អញ្ចឹងពេលជិះទៅអាចនឹងឃ្លីងឃ្លោងបន្តិច តែគេធ្វើបែបនេះដើម្បីដឹកទម្ងន់បានច្រើន ។

តម្លៃក្នុងស្រុកបងប្អូនអាចរកទិញបានចន្លោះពី ១០០០០ដុល្លារស្តើង ទៅ ១០០០០ដុល្លារក្រាស់ អាស្រ័យ លើ Option ឆ្នាំផលិត ពណ៌ និងតាមប្រភេទ ស្លក់លេខ ឬក្រដាស់ពន្ធជាដើម។

ជារួម តម្រូវការភាគច្រើន គឺសម្រាប់បងប្អូន ដែលមានសមាជិកគ្រួសារច្រើន ឬក្រុមហ៊ុន ឡានដឹកសិស្សសាលា ឬសម្រាប់ប្រកបជាអាជីវកម្មជាដើម។

ហើយអ្វីដែលត្រូវបារម្ភ និងប្រុងប្រយត្ន័ខ្ពស់នោះគឺ បញ្ហាច្រេះ និងពុកផុយសាច់ដែកបាតក្រោមជាដើម ព្រោះឡានមកពីប្រទេសកូរ៉េ ភាគច្រើនប្រើក្នុងស្ថានភាពធ្លាក់ព្រិល និងទឹកកក ។ ម្យ៉ាងទៀតឧស្សាហ៍មានបញ្ហាទៅលើ ម៉ាសុីន ប្រអប់លេខ និង Turbo ដូច្នេះពេលទិញប្រើត្រូវពិនិត្យអោយបានច្បាស់ ពិសេសសុំការធានាពីខាងឃ្លាំងលក់ឡានទៀត កាន់តែល្អ៕

អត្ថបទ៖ BunSak