Kia Visto ឆ្នាំ១៩៩៩ ដល់២០០៣ ជាប្រភេទកូនឡាននាំចូលពីប្រទេសកូរ៉េ Visto បានក្លាយជារថយន្ដដែលទទូលបានការចាប់អារម្មណ៍ច្រើន សម្រាប់បងប្អូនដែលមាន ថវិកាខ្ទង់ ២០០០ដុល្លារ។ វាជាប្រភេទ Hachback ឬ City Car ដែលមានទ្វា ៥ កៅអី ២ជួរ អាចជិះបានគ្នា៥ នាក់និងឃ្លុបក្រោយតិចតួច សម្រាប់ដាក់ឥវ៉ាន់។

តូចមែនតែអាចរត់បានគួរសម មានម៉ាសុីនត្រជាក់ ឧបរកណ៍ចាក់តន្ត្រី គ្រាន់កំដរអារម្មណ៍លោកអ្នក ពីភ្នំពេញទៅសៀមរាបអីបាន (តែជិះឆ្ងាយ ត្រូវឈប់តាមផ្លូវច្រើនដង) ។

តម្លៃអាចទិញបានក្នុងចន្លោះ ២០០០ដុល្លារ ទៅ ២៥០០ដុល្លារជាង Visto

មិនសូវជាចំណាយច្រើនឡើយលើការថែទាំទេ ខ្ទង់ ២០ដុល្លារ ទៅ១០០ដុល្លារប៉ុណ្ណោះ ។

វាមានម៉ាស៊ីនតូចមួយ ៣ស៊ីឡាំង ចំណុះ០.៨លីត្រ ផលិតកម្លាំងបាន ៥៤សេះ ប្រអប់លេខ ៤វគ្គអូតូ បង្វិលកង់ដោយប៉ុងមុខ (FWD) រត់លឿនបំផុតបាន១៤៥គីឡូម៉ែត្រ/ម៉ោង។

តែចាប់ពីឆ្នាំ២០០១ Kia បំពាក់បន្ថែមនៅ Turbo ជំនួយកម្លាំបាន៧០សេះ (ខ្មែរហៅម៉ាសុីនធំ) អាចរត់ល្បឿនបាន ១៥០គីឡូម៉ែត្រ/ម៉ោង។

ចំពោះកម្រិតស៊ីសាំង ជាមធ្យមចន្លោះពី ៤លីត្រទៅ ៦លីត្រក្នុង១០០គីឡូម៉ែត្រ តាមស្ថានភាពផ្លូវ និងការបើកបរជាក់ស្ដែង។

ជើងក្រោមប្រើជាប្រភេទរឺស័រ គួបផ្សំជាមួយយ៉ាន់កង់តូច ១៣អីញ អាចទប់ទម្ងន់រថយន្ដ ៨៦០គីឡូក្រាម និងដឹកបានប្រមាណជា៣០០គីឡូដោយមិនមាន បញ្ហាឡើយ។

វាគួរសមដែរ សម្រាប់អំឡុងពេលសាំងកំពុងឡើងថ្លៃបែបនេះ អាចរត់បានដូចគេឯងដែរ ពិសេសក្នុងក្រុងស្រួលបើកបរណាស់។ បងប្អូនណាខ្លះដែលធ្លាប់មានអនុស្សាវរីយ៍ជាមួយកូនឡានកូរ៉េ Kia Visto នេះ អាចបញ្ចេញនៅបទពិសោធន៍ក្នុង Comment បាន៕

អត្ថបទ៖ BunSak