Compact SUV របស់ Lexus ម៉ូឌែល RX300 ជាឡានដែលពេញនិយមនៅស្រុកខ្មែរខ្លាំងហើយបច្ចុប្បន្ននេះ ក៏នៅតែមានសន្ទុះខ្លះៗដែរ។ ទោះបីជាមានអាយុកាល ២០ឆ្នាំជាងហើយក្ដី តែរូបរាង និងភាពខាងក្នុងនៅតែទាក់ទាញ និងទាន់សម័យដដែល។

ដោយមើលឃើញពីអាយុកាលចាស់ឆ្នាំរបស់វា និងទីផ្សារមិនណឹងនរ សម្រាប់បច្ចុប្បន្ន ថ្ងៃនេះ Advan Auto នឹងបើកបង្ហាញពីបញ្ហាមួយចំនួនដែលបងប្អូនគួរតែពិចារណា មុនសម្រេចចិត្តប្រើវាក្នុងឆ្នាំ២០២២នេះ។

វាប្រើម៉ាស៊ីនធំគ្រាន់បើ គឺទំហំ ៦សុីឡាំង ចំណុះ ៣.០លីត្រ ផលិតកម្លាំង ២២០​​សេះ និងកម្លាំងរមួល ២២២ផោនហ្វីត រត់ដោយប្រអប់លេខ ៤វគ្គអូតូ បង្វិលកង់ដោយប្រភេទ ប៉ុងមុខ(FWD) និងប៉ុងមុខក្រោយ(AWD)។ អាចរត់បានក្នុងល្បឿនអតិបរិមា ១៨៥គីឡូម៉ែត្រ/ម៉ោង ដែលជាន់ស្ទុះពី ០-១០០គីឡូមែត្រ ប្រើពេល ៩.១វិនាទី។

កម្រិតសុីសាំងចេញពីរោងក្រចកាលពី២០ឆ្នាំមុន ក្នុងក្រុងវាសុី ១៥លីត្រ និងក្រៅក្រុងផ្លូវលាត ១២លីត្រ។ តែបើតាមបទពិសោធពីបងប្អូននាក់ប្រើប្រាស់បច្ចុប្បន្ន បញ្ជាក់ថាវាស៊ីខ្ទង់ ១៤លីត្រ ទៅ ១៨លីត្រក្នុង១០០គីឡូម៉ែត្រ។

ចំពោះតម្លៃទីផ្សារបច្ចុប្បន្នស្លាកលេខចន្លោះពី ៨០០០ដុល្លារជាង ទៅ ១៦០០០ដុល្លារជាង អាស្រ័យលើឆ្នាំផលិត ពណ៌ និងភិនភាគជាក់ស្ដែងជាដើម។ ការចំណាយលើកការថែទាំនិងជួសជុលខ្ទង់ ២០០ដុល្លារ ទៅ៦០០ដុល្លារ អាស្រ័យលើកកម្រិតខូចខាតជាក់ស្ដែង។

ចំពោះគុណវិបត្តិ ក៏ដូចជាបញ្ហាមួយចំនួនដែល Lexus RX300 ចាស់ឆ្នាំបែបនេះ ភាគច្រើនតែជួបប្រទះដូចជា៖

-ពេលទិញមកតម្លៃទោះធូរ ឬថ្លៃ តែទីផ្សាររបស់ RX300 លក់វិញខាតច្រើន

-សាច់ដែកស្ទើរ មានច្រេះ ឬប៉ុកជើងក្រោម ដែលភាគច្រើនទៅលើប្រភេទ រត់ប៉ុងពីរ

-កក្តាស៊ីសាំងច្រើនជាងមុន ជាបញ្ហាចម្បងសម្រាប់បងប្អូននាក់ប្រើ RX300 ក្នុងបរិបទសព្វថ្ងៃ

-គ្រឿងបន្លាស់ថ្លៃ និងពន្ធផ្លូវក៏គួរសមដែរ ៦០ម៉ឺនក្នុងមួយឆ្នាំ

និងបញ្ហាមួយចំនួនដូចជា៖

-លេចជ្រាបប្រេងម៉ាស៊ីន និងប្រេងប្រអប់លេខ

-ស្ទើរម៉ាស៊ីន និងប្រអប់លេខ

-បញ្ហាលើបូមចង្កូត និងជើងក្រោម

-ឧស្សាហ៍ឆ្លងប្រព័ន្ធភ្លើង មូយចំនួនជាដើម។

ជារួមសម្រាប់បងប្អូនដែលចង់ទិញប្រើក្នុងឆ្នាំ២០២២នេះ គួរតែពិនិត្យអោយបានច្បាស់ និងដឹងពីរបញ្ហាខ្លះៗក៏ល្អដែរ។ បើប៉ះឡាននៅស្អាតប្រើថែទាំបានល្អ គុណភាពឡានក៏នៅតាមហ្នឹងដែរ ម្យ៉ាងទៀតវានៅតែជិះស្រួល ព្រោះជើងក្រោមទាំងមុខក្រោយ បំពាក់ប្រព័ន្ធឯករាជ Independent Suspension ធ្វើការទប់លំណឹងឡានបានល្អមិនសូវឃ្លោង ឬរលាក់ឡើយ។

តែចំពោះគុណវិបត្តិ ៣-៤ ខាងលើប្រហែលជាបងប្អូនជៀសមិនផុតទេ អញ្ជឹងព្យាយាមប្រើប្រាស់ថែទាំខ្លះទៅ។ ឧស្សាហ៍ត្រួតពិនិត្យ ផ្លាស់ប្ដូរ ប្រេងអោយបានត្រឹមត្រូវ របស់ខ្លះត្រូវដល់ពេល និងអាយុកាលត្រូវប្ដូរគួរតែប្ដូរចេញ កុំឲ្យឆ្លងរាលដាលដល់មុខងារផ្សេងទៀត ឡានចាស់ឆ្នាំតែប៉ុណ្ណឹងហើយ៕

អត្ថបទ៖ BunSak