RX300 ត្រូវបានគេស្គាល់ថាជាឡានប្រភេទ Crossover ឬ SUV ខ្នាតកណ្តាលរបស់ Lexus ដំបូងបំផុត ទទួលបានការពេញនិយមខ្លាំងក្នុងសហរដ្ឋអាមេរិក និងបណ្ដាប្រទេសជាច្រើនទៀតក៏ដូចជាកម្ពុជាផងដែរ។

ចំពោះបរិបថនៅស្រុកខ្មែរយើងគ្រប់ជំនាន់ទាំងអស់នៃត្រកូល​ RX ភាគច្រើនពេញនិយម ជំនាន់ទី១​ ដល់ទី៣ យើងតែងឃើញចររាចណ៍លើដងផ្លូវ ពេញផ្ទៃប្រទេសតែម្ដង។ 

ថ្ងៃនេះ Advan Auto សូមបើកបង្ហាញនៅម៉ូឌែល RX300 ជំនាន់ទី១ ដែលផលិតចាប់ពីឆ្នាំ ១៩៩៩ ដល់ ២០០៣ ដែលល្បីឈរជើងយូរឆ្នាំជាងគេ តើវាមានលក្ខណៈសម្បត្តិអ្វីខ្លះបានជាគេនិយមខ្លាំងម្លេះ?

Lexus RX ជំនាន់ទីមួយនេះ បំពាក់ម៉ាស៊ីន ៦​ ស៊ីឡាំង មុខកាត់ ៣.០លីត្រ ផលិតកម្លាំង ២២០សេះ និងកម្លាំងរមួល ២២២ផោនហ្វីត បើកលឿនបំផុតបាន ១៨៥គីឡូម៉ែត្រ/ម៉ោង ដែលជាន់ស្ទុះពី ០-១០០គីឡូមែត្រ

ប្រើពេល ៩.១វិនាទី ។ រត់ដោយប្រអប់លេខ ៤ វគ្គអូតូ និងមានជម្រើសប៉ុងមុខ (FWD) និងប៉ុងមុខក្រោយ (AWD)។

ចំពោះកម្រិតស៊ីសាំងវិញចន្លោះ ១១​លីត្រទៅ ១៣ លីត្រក្នុង ១០០គីឡូម៉ែត្រ អញ្ចឹងបើប្រើវា ត្រៀមលុយចិញ្ចឹមសាំងផង ។

បើនិយាយពីជម្រើស ឬ Option គួរបញ្ជាក់ថា RX ជំនាន់ទីមួយឆ្នាំ ៩៩ ទៅ ២០០០ មិនមាន Option អ្វីឡើយ ជាប្រភេទធម្មតា និងមានតែពីរជម្រើសប៉ុណ្ណោះ គឺប្រភេទប៉ុងមួយ និងប៉ុងពីរ។ តែចាប់ពីឆ្នាំ ២០០១-២០០៣ បំពាក់ហ្វមីកាឈើ នឹងស្បែក ព្រមទាំងបែងចែកជា ៣ Option ដូចជា៖

• Base Option ជាប្រភេទធម្មតា ជាទូទៅ RX300 មិនថាឆ្នាំណាទេ គឺបំពាក់មកជាមួយ ពូកស្បែក កៅអីចុចមកជាស្តង់ដារស្រាប់ ។ 
• Haft Option វិញរាងគ្រាន់ជាងនិងដោយមាន កម្ដៅកៅអីអំពូលឡែស៊រ រ៉េឡើងចុះពេលចុះឡើងទួលជាដើម ។
• Full Option ពិសេសត្រង់មាន ម៉ាញ៉េថាច់ ផែនទី និង Speaker JBL ជាដើម។

ខាងក្នុងជាប្រភេទឡាន Crossover SUV ទ្វា ៥ កៅអី ២ជួរ ទូលាយគួរសមអាចជិះបានគ្នា ៥ ទៅ ៦នាក់ក៏បាន (ឲ្យតែពូកកែញាត់) និងសល់គូទក្រោយសម្រាប់ដាក់ឥវ៉ានបានច្រើន ។ 

RX300 ក៏បំពាក់ជាមួយ កៅអីចងចាំទីតាំង (សម្រាប់កៅអីជួរមុខ) កញ្ចក់ទាំងបួនអូតូ ម៉ាសុីនត្រជាក់ ៦ប្រឡោះ និង មានកន្លែងដាក់ដៃ (Arm Rest) ទាំងខាងមុខខាងក្រោយផងដែរ មុខងារមួយចំនួនបញ្ជារដោយ ថាច់ និងប៉ូតុង​។

វាមានប្រវែង ៤៥៨០ម.ម ទទឹង ១៨១៥ម.ម​ កម្ពស់ ១៦៧០ម.ម ពីដីមកបាត ២០០ម.ម​ ទម្ងន់ធ្ងន់គួរសម ១៧៨០គីឡូក្រាម និងផ្ទុកទម្ងន់បាន ៥០០គីឡូក្រាម។

ប្រព័ន្ធជើងក្រោមវិញ​បំពាក់ យ៉ាន់កង់ ១៦អីញ ប្រើប៉ូម រុឺស័រធម្មតា (MacPherson Strut) នៅផ្នែកខាងមុខ ចំណែកខាងក្រោមប្រើប្រព័ន្ធឯករាជ ប្រភេទ Multi-Link Suspension ជួយទប់លំនឹងបានល្អ ធ្វើឲ្យជើងក្រោមហាប់ណែន និងកាត់បន្ថយរលាក់ ។ វាបន្ថយល្បឿនដោយហ្វ្រាំងឌីសគៀបទាំងបួន ជួយឲ្យកាន់ជាន់ហ្រ្វាំងមានប្រសិទ្ធភាពជាងឡានប្រើហ្រ្វាំងឌីសតែ ២ និងមានប្រពន្ធទប់លំនឹង VSC ផង ធ្វើអោយការបើកបរមានភាពបតបែនបានគ្រប់ស្ថានភាពផ្លូវតែម្ដង។

ចំពោះតេស្ដប៉ុកប៉ះ RX ទទួលបានផ្កាយ៥ ពេញ ដោយសារពោងសុវត្ថិភាពធ្វើការបានល្អ ពីមុខ ទាំងក្បាល ជើង និងចំហៀង ព្រមទាំងគ្រោងឆ្អឺងមាំផងនោះ ។

តម្លៃស្រុកខ្មែរអាចរកទិញបានចន្លោះពី ១០០០០ ដុល្លារជាង ទៅ ២០០០០ ដុល្លារអាស្រ័យលើ ឆ្នាំពណ៍ Option និងគុណភាពជាក់ស្ដែង។ គ្រឿងបន្លាស់ក៏ធូរថ្លៃគួរសមដែរ ពេលជួសជុលចំណាយខ្ទង់ ៥០ ទៅ ៤០០ដុល្លារជាង។

បើគិតមកទល់និងពេលនេះ​ វាមានអាយុ២០ឆ្នាំ ឡានចាស់ម៉ាស៊ីនរាងធំគ្រាន់បើដូចវាទៀត

អាចស៊ីសាំងច្រើនបន្ដិចហើយ។ តែខាងក្នុងស្អាត សាច់ដែកនៅល្អគ្រាន់ ម៉ាស៊ីនប្រអប់លេខអេម មិនជាបញ្ហាទេ សម្រាប់ប្រើគ្រួសារ ជាពិសេសអ្នកឧស្សាហ៍ចុះខេត្តត្រូវណាស់ ជាន់ស្ទុះបើកធ្ងន់ណឹងល្អហើយរាងស្ងាត់ទៀតផង បើយើងប្រើថែ ក៏វាមិនងាយឈឺផ្តេសផ្តាសដែរ ។

អត្ថបទ៖ BunSak