ប្រសិនបើអ្នកកំពុងមានតម្រូវការប្រើប្រាស់រថយន្ដ Pick Up ពិសេសប្រើតាមខេត្ដត្រូវដឹកបន្លែផ្លែឈើ Advan Auto សូមលើកយករថយន្ដពីរគ្រឿង មានភាពធន់ល្អ និងតម្លៃសមរម្យ វាក៏នៅពេញនិយមខ្លាំងដែរសម្រាប់ស្រុកខ្មែរ នោះគឺ Toyota Tacoma ឆ្នាំ ៩៧ ដល់០១ និង Nissan Frontier ២០០០ ដល់ឆ្នាំ ២០០៤ ដែលជាគូប្រជែងគ្នាស្លាប់រស់នៅស្រុកខ្មែរ

កាលពី២០ឆ្នាំមុន ។

១.Tacoma ឆ្នាំ ១៩៩៧-២០០១

ចំពោះ Tacoma ជំនាន់ទីមួយ រាងចាស់ឆ្នាំមែន តែនៅអាចប្រើការបាន មិនជាបញ្ហាអ្វីទេអោយតែប៉ះឡានស្អាត ។ វាបំពាក់មាស៊ីន​ ៤ ស៊ីឡាំង ២.៤លីត្រ​ ផលិតកម្លាំង ១៤២សេះ កម្លាំងរមួល ១៦០ ផោនហ្វីត ល្បឿនលឿនបំផុត ១៨៥ គីឡូមែត្រ/ម៉ោង និង មានជម្រើស ៦ស៊ីឡាំង​ មុខកាត់ស៊ីឡាំង ៣.៤លីត្រ ផលិតកម្លាំង ១៩០សេះ កម្លាំងរមួល ២២០ ផោនហ្វីត ល្បឿនលឿនបំផុត ២១១គីឡូមែត្រ/ម៉ោង។

វាស៊ីសាំងជាមធ្យម ១០លីត្រ ទៅ ១២លីត្រ ក្នុង ១០០គីឡូមែត្រ ឬច្រើនជាងនេះទៅតាមការប្រើប្រាស់ជាក់ស្ដែង។

Toyota Tacoma ឆ្នាំ៩៧ ដល់ឆ្នាំ២០០១ មានទាំងប្រភេទ រត់ដោយប៉ុង១ និងប៉ុង២ ខ្ពស់ទាប ទ្រុងវែងខ្លី ទ្វា ២ និងទ្វា ៤ ប្រលេខ ៤ វគ្គ ៥ វគ្គអូតូ និងជម្រើសលេខដៃ។

ប្រព័ន្ធជើងក្រោមវិញ Tacoma ឆ្នាំចាស់ជំនាន់ទីមួយមិនអន់ប៉ុន្មានទេ យ៉ាន់កង់តូច ១៤ អីង បំពាក់ ABS ហ្វ្រាំងគៀបខាងមុខ និងខាងក្រោយប្រភេទហ្វ្រាំងតាំបួរ ។ ជើងក្រោមខាងមុខ ពាក់ស្លាបប្រចៀវឌុប (double wisbon ) និងខាងក្រោយប្រភេទចន្ទៀស (Leaf) ទប់ទល់លើការដឹកទំនិញច្រើន។

ភិនភាគខាងក្រៅវិញ ប្រើចង្កៀងធម្មតាប្រភេទ Halogen  ទទឹង ១៧៨១ ម.ម បណ្ដោយ ៥១៣៨ម.ម ទ្រុងខាងក្រោយ ប្រវែង ១៤៥៥ម.ម កម្ពស់ ១៧១៥ម.ម ពីដីមកបាត ២១៥ម.ម ទម្ងន់១២០០គីឡូក្រាម ខាងក្រោយដឹកបានច្រើនគួរសម ៨០០គីឡូក្រាម និងសណ្ដោងបាន ១៦០០ គីឡូក្រាមថែមទៀត។

២. Nissan Frontier ២០០១-២០០៤

Nissan ជំនាន់ទី ២ ឆ្នាំ ២០០១ ដល់ ២០០៤​ ក៏ពេញនិយមខ្លាំងណាស់ដែរ ២០ឆ្នាំមុននរណាមិនល្បីថា Nissan ជាកំពូលរថយន្ដតាក់ស៊ីផ្ដាច់ប្រលឹង នឹងដឹកប៉ុន្មានក៏បានអោយតែដាក់កើត។ 

មិនខុសពី Tacoma ឡើយ មានច្រើនជំរើស ម៉ាស៊ីន៤ ស៊ីឡាំង​ ២.៤ លីត្រ ផលិតកម្លាំង ១៤៣សេះ កម្លាំងរមួល ១៥៤ ផោនហ្វីត​ ល្បឿនលឿនបំផុត ១៧០គីឡូម៉ែត្រ/ម៉ោង។

ជម្រើសមួយទៀតគឺម៉ាស៊ីន ៦ ស៊ីឡាំង មុខកាត់ស៊ីឡាំង ​៣.៣ លីត្រ ផលិតកម្លាំង ១៧០សេះ កម្លាំងរមួល ២០០ ផោនហ្វីត បើកលឿនបំផុត ២០៣គីឡូម៉ែត្រ/ម៉ោង។ វារត់ដោយប៉ុង១ និងប៉ុង២ មានប្រភេទទ្រុងវែងខ្លី ទ្វា ២ និងទ្វា៤ ប្រអប់លេខ ៥ វគ្គអូតូ និងជម្រើសលេខដៃ។ 

​វាស៊ីសាំងជាមធ្យមចន្លោះ ១០ ទៅ ១២លីត្រក្នុង១០០គីឡូម៉ត្រ។

ប្រពន្ធ័ជើងក្រោមវិញ Nissan មិនខុសពី Tacoma ប៉ុន្មានទេ បំពាក់យ៉ាន់កង ១៥ អ៊ីញ  ABS ហ្វ្រាំងគៀបខាងមុខ និងខាងក្រោយប្រភេទហ្វ្រាំងតាំបួរ។ ជើងក្រោមខាងមុខ បំពាក់ស្លាបប្រចៀវឌុប(double wisbon ) ដូច Tacoma និងខាងក្រោយប្រភេទចន្ទៀស (Leaf) ងាយស្រួលដឹកទំនិញបានច្រើន។

ខាងក្រៅវិញ ប្រើចង្កៀងធម្មតារាងលៀនៗ ទទឹង ១៦៩០ម.ម បណ្ដោយ ៤៩៩៩ម.ម ទ្រុងខាងក្រោយ ប្រវែង ១៥០០ម.ម កម្ពស់ ១៦០៥ម.ម កម្ពស់ពីដីមកបាត ១៧៨ម.ម ទម្ងន់ ១៤៤៥គីឡូក្រាម ខាងក្រោយដឹកបា ន៧០០គីឡូក្រាម និងសណ្ដោងបាន ១៦០០គីឡូក្រាមថែមទៀត។

ទាំងពីរម៉ូឌែលនេះខាងក្នុងធម្មតា​ ការពារដោយពោងសុវត្ថិភាព ៤គ្រាប់ រន្ធម៉ាសុីនត្រជាក់ ៤ប្រឡោះ មានម៉ាញ៉េចាក់ CD វិទ្យុ ប៉ូតុងបញ្ជាមុខងាមួយចំនួន តែខាងអ្នកដំណើររាងចង្អៀតបន្ដិច​ មិនជាទូលាយអ្វីទេ ជិះគ្នា ៥នាក់អីល្មមសម្រាប់ប្រភេទ​​ ទ្វា៤។

២ ម៉ូឌែលនេះ ថ្វីត្បិតថាមានអាយុ ២០ ឆ្នាំហើយមែន តែអាចទទួលយកបាន ប្រើគ្រប់ស្ថានភាពផ្លូវទាំងអស់ ហើយតម្លៃក៏ថេរល្អដែរ លក់វិញមិនសូវជាខាតច្រើនទេ ប្រើថែក៏មិនងាយខូចដែរ ​សម្បូរគ្រឿងបន្លាស់ណាស់ ហើយធូរថ្លៃទៀត គ្រាន់តែវាមិនមានអ្វីឲ្យយើងប្រើច្រើន ក្រៅតែពីប្រើដឹកទំនិញ ។

អត្ថបទ៖​​ BunSak