គ្រាន់តែលឺឈ្មោះថា Tacoma នរណាក៏ដឹងដែរ ថាជារថយន្ដ Pick up ដែលប្រជាជននៅទីក្រុង និងបណ្ដាខេត្ត តែងប្រើប្រាស់វា ក្នុងការជួយសម្រួលដល់អាជីវកម្មដឹកទំនិញចេញចូល និងប្រើបានគ្រប់ស្ថានភាពផ្លូវទាំងអស់។

ក្នុងជំនាន់ទី ២ ឆ្នាំ ២០០៥ ដល់ ២០១១ Tacoma បានបែងចែងចេញជា៦ ជម្រើស (Trim) រួមមាន Pre-Runner  SR, Pre-Runner SR5, TRD Sport, TRD Off-Road, Limited, និង TRD Pro ប្រភេទទ្រុងវែងនឹងខ្លី ។

ក្នុងអត្ថបទនេះ Advan Auto សូមលើបង្ហាញ​ Toyota Tacoma ជំនាន់ទី២ ២០០៥ Pre-Runner SR5 ដែលពេញនិយមនៅកម្ពុជា។  

ចំពោះម៉ាស៊ីនវិញមិនខុសពីជំនាន់ទីមួយប៉ុន្មានទេ Tacoma បំពាក់ម៉ាស៊ីន ៦ស៊ីឡាំង មុខកាត់ស៊ីឡាំង ៤.០លីត្រ បង្កើនកម្លាំង ២៤៥ សេះ កម្លាំងរមួល ២៨២ ល្បឿនលឿនបំផុត ២៣០គីឡូ/ម៉ោង ប្រើប្រអប់លេខ ៦ វគ្គអូតូ បំពាក់ប៉ុងដែលជំនួយដោយអេឡិចត្រូនិក កាប់ពីតាស រត់ដោយប៉ុងក្រោយ (RWD) និងមានជម្រើសប៉ុងពីរ (AWD) ។ កម្រិតស៊ីសាំងវិញ ១២-១៥លីត្រ/១០០គីឡូម៉ែត្រ។

បើយយើងនិយាយពីឡាន Pick Up យើងត្រូវនិយាយពីប្រព័ន្ធជើងក្រោម​ ដោយ Tacoma ០៥ ប្រើជើងក្រោមខាងមុខបំពាក់ស្លាបប្រចៀវឌុប (Double Wishbone) ខាងក្រោយប្រើជាមួយនិងជន្ទៀស (​Leaf Spring) ដើម្បីដឹកទម្ងន់បានច្រើន ក៏ប៉ុន្តែសម្រាប់ការបើកបរលើផ្លូវធម្មតា មិនមានដឹកទម្ងន់ធ្ងន់ វាអាចនឹងរលាក់ឬលោត បំពាក់ហ្វ្រាំងគៀប ជំនួយដោយប្រព័ន្ធ ABS​ ។

ចំពោះរូបរាងខាងក្រៅ វាជាប្រភេទឡាន​ Pick Up ទ្វា ៤ រាងវែង និងខ្ពស់ល្មមអាចបើកបរបានគ្រប់ឧបសគ្គ។ ប្រើចង្កៀងធម្មតាប្រភេទ Halogen រាងមូលលៀនៗបន្តិច និងមានពិលកាង ប៉ាណាខាងមុខមានប្រឡោះធំៗដើម្បីស្រួលខ្យល់ចូលទៅស្អំម៉ាសុីន។​ ទ្រុងខាងក្រោយទូលាយ​ល្អសម្រាប់ដឹកឥវ៉ាន់ ផ្ទុកទម្ងន់បាន ៧០០គីឡូក្រាម​ និងសន្ដោងទម្ងន់បន្ថែម ១៥០០គីឡូក្រាមមានឆ្នាន់ជើងស្រោបដោយក្រូម ជាពិសេសមានឌុយដាំបាយទៀតផង​ និងស្ដុបក្រោយ LED មើលទៅស្អាតម៉្យាងដែរ។ វារាងធំហើយវែងបន្ដិចដោយ កម្ពស់ ១៧៨០ម.ម ប្រវែងបណ្តោយ ៥៦២១ម.ម ទទឹង ១៨៩៥ម.ម និងទម្ងន់ ១៧៩០ គីឡូក្រាម ។ Tacoma ០៥ បំពាក់ដោយកង់ទំហំ ១៨អុីញ ធ្វើឲ្យវាមានកម្ពស់ពីដីដល់បាតឡានប្រមាណ ២៣ ស.ម។

រចនាខាងក្នុង កៅអី ២ជួរ​ ជិះបានគ្នា ៥នាក់ បំពាក់ប៊ូតុងបញ្ជាលើចង្កូត ប៉ូតុង (មួលបង្វិល) បញ្ជាកាបពីតាស់​ ពួកស្បែក រន្ធម៉ាសុីនត្រជាក់ ៤ ប្រឡោះ ខាងក្នុងដេគ័រធម្មតាៗមិនជាប្លែកអ្វីទេ សម្រាប់អ្នកដំណើរក្រោយរាងចង្អៀតបន្ដិចនៅត្រង់កន្លែងដាក់ជើង ព្រោះវាជាប្រភេទ Pick Up ដឹកទំនិញ ។

មកមើលប្រព័ន្ធសុវត្ថិភាពវិញ ពោង ៦ គ្រាប់អាចការពារសុវត្ថិភាពបានគ្រប់គ្រាន់ កង់មុខជំនួយដោយ ABS អាចដឹងដោយស្វ័យប្រវត្តិនៅពេលដែលហ្វ្រាំងគៀបកង់មិនអាចបត់បាន វាជួយកែប្រែសម្ពាធហ្វ្រាំងដើម្បីឱ្យកង់អាចបតបែនបានធម្មតា ។ 

សម្រាប់ការតេស្ដកម្រិតប៉ុកប៉ះ ទទួលបានផ្កាយ៥ ពីនាយកដ្ឋានសុវត្ថិភាពចរាចរណ៍ផ្លូវគោកសហរដ្ឋអាមេរិក។

បច្ចុប្បន្នតម្លៃក្នុងស្រុកខ្មែរ ចន្លោះ​ ១៧០០០ ដុល្លារ ទៅ ២៣០០០ដុល្លាជាង អាស្រ័យតាមពណ៍ Option ឆ្នាំផលិត និងភិនភាគជាក់ស្ដែង។

ជាចុងក្រោយ Tacoma ឆ្នាំចាស់មែន តែTacoma ធ្វើបានល្អច្រើនបើប្រៀបជាមួយរថយន្ដ Pick Up ស្របាក់ស្របាគ្នា ឬអាយុបងក្ដី។

វាស៊ីសាំងបន្ដិច តែធន់ល្អស្រួលប្រើ មិនសូវមានបញ្ហាអ្វីច្រើនទេ បើទិញប៉ះឡានស្អាតវិញ ដឹងតែប្រើដាំខ្ទឹមតែម្ដង ចំណែកឯគុណតម្លៃលក់ចេញវិញ ក៏នៅខ្ពស់គួរសម ។

អត្ថបទដោយ៖ BunSak 

…………………………………………………………………..

ដើម្បីទទួលបានព័ត៌មាន ចំណេះដឹង និងវីដេអូថ្មីៗទាក់ទងនឹងរថយន្ដសូម ៖

Follow Facebook Page : 👉 Advan Auto

Subscribe Youtube Channel : 👉Advan Auto

Follow TikTok : 👉Advan Auto