• ចុច Subscribe Channel Telegram របស់ Advan Auto ដើម្បីទទួលបានព័ត៌មាន ចំណេះដឹង និងការកំសាន្ដថ្មីៗអំពីរថយន្ដ

ឡានមួយទឹកនៅស្រុកខ្មែរយើងមាន ២ ប្រភេទ គឺឡានក្រដាសពន្ធដែលនាំចូលពីក្រៅប្រទេស និងឡានផ្លាកលេខដែលគេជិះហើយនៅស្រុកខ្មែរយើង។  ខណៈដែលការទិញឡានផ្លាកលេខជាជម្រើសល្អមួយសម្រាប់អ្នកចង់សន្សំថវិកា តែយ៉ាងណាអ្នកក៏អាចជូប ហានិភ័យមួយចំនួនដែរ ដូច្នោះហើយ Advan Auto នឹងចែករំលែក ៥ តិចនិចដើម្បីទិញឡានមួយទឹកផ្លាកលេខ 

1. ស្រាវជ្រាវមើលទីផ្សារសិន

ជាដំបូងអ្នកអាចស្រាវជ្រាវមើលតាមវេបសាយលក់ឡានអនឡាញ ហ្វេសប៊ុកគ្រុប ឬតេឡេក្រាម ឬ សួរអ្នកមានបទពិសោធន៍ជាដើម ដើម្បីដឹងថា តម្លៃឡានក្រដាសពន្ធប៉ុណ្ណា តម្លៃឡានផ្លាកលេខធ្លាក់ថ្លៃសល់ប៉ុន្មាន គ្រឿងបន្លាស់ជាមធ្យមជួសជុលអស់ប៉ុន្មាន ដើម្បីងាយស្រួលតថ្លៃនៅពេលទៅទិញ ។

អ្នកអាចប្រើវិធីសាស្រ្ដរកមើលតម្លៃមធ្យមភាគ ដោយគ្រាន់តែរើសឡានមួយដែលខ្លួនចង់ទិញ ដើររកតម្លៃពីអ្នកលក់ ៥ នាក់បូកបញ្ចូលគ្នា ហើយចែកនឹង ៥ វិញ នោះអ្នកនឹងឃើញតម្លៃជាមធ្យមរបស់ឡានមួយទឹកផ្លាកលេខជាមិនខាន ។

2. ឆែកមើលប្រវត្តិ និងឯកសារ

ឡានមួយទឹកផ្លាកលេខ អាចមានច្រើនប្រភេទ អាចជាឡានដែលម្ចាស់ទី១ ជិះ ឬអាចជាឡានដែលគេលក់តគ្នា ២-៣ ម្ចាស់ហើយមិនបានកាត់ឈ្មោះ ឬក៏អាចជាឡានដែលលក់ប្រញាប់យកលុយ។ ដូចនេះរឿងដំបូងដែលអ្នកត្រូវធ្វើគឺសុំឆែកមើលឯកសារដើម ជាពិសេសសុំអត្តសញ្ញាណប័ណ្ណម្ចាស់ដើម ជាមួយនឹងលិខិតទិញលក់ដែលមានការទទួលស្គាល់ត្រឹមត្រូវ ។

ប្រសិនបើឡាននោះមានត្រឹមកាតគ្រីនិងផ្លាកលេខ តែមិនមានលិខិតបញ្ជាក់ការលក់ដូរ និងអត្តសញ្ញាណប័ណ្ណម្ចាស់ដើមទេ អ្នកមានជម្រើស២ គឺដើរចេញ ឬមួយក៏ប្រថុយទិញឡានដែលមានត្រឹមតែកាតគ្រី ហើយដាក់តម្លៃឲ្យទាបជាងឡានផ្លាកលេខដែលទិញពីម្ចាស់ដើមទី ១ ។

បន្ទាប់ពីឆែកឯកសារហើយ អ្នកអាចយកលេខ VIN ដែលជាទូទៅគេបិទនៅជាប់មាត់ទ្វារក្បែរកៅអីតៃកុងឡាន ទៅឆែកមើលប្រវត្តិឡានតាមរយៈ Autocheck ឬក៏ Carfax ជៀសវាងទិញប៉ះចំឡានបុកប៉ះ កាត់ត លិចទឹក ស្ងោរប្តូរពណ៌ និងចោរលួចជាដើម ជាពិសេសមើលពីចំនួន Mile ឬគីឡូម៉ែត្រដែលគេជិះនៅក្រៅប្រទេស បើសិនជាឡានដែលគេជិះច្រើនគីឡូ ជាមួយនឹងប្រវត្តិមិនសូវល្អផងនោះ អ្នកមិនគួរប្រថុយទិញទេ ។ 

3. បើកសាកល្បង

ការបើកសាកល្បងឡានមួយទឹកត្រូវបានចែកជា ៣ ដំណាក់កាល 

ទី១ អ្នកត្រូវធ្វើតេស្តសន្ទុះជាមុនសិន ដើម្បីសាកគុណភាព និងសន្ទុះម៉ាស៊ីនឡាន ជាពិសេសសាកលំនឹងចង្កូតឡាន ថានៅដំណើរការល្អដែរឬអត់ពេលឡានស្ទុះ។ ទី ២ ធ្វើតេស្តសមត្ថភាពទប់លំនឹងនៅលើផ្លូវកោង និងផ្លូវកែង ដើម្បីដឹងពីសមត្ថភាពជើងក្រោមរបស់ឡាន។ ទី៣ ស្តាប់សម្លេងមិនប្រក្រតីពីផ្នែកមេកានិកផ្សេងៗដូចជា កង់មុខក្រោយ ចង្កូត ជើងក្រោម និងខាងក្នុងឡាន។ 

4. យកឲ្យជាងជួយឆែកមើល

បើសិនជាមិននៅមានមន្ទិលសង្ស័យ គួរយកឡានឡើងប៉ុងឲ្យជាងជួយឆែកមើល ដោយហេតុថាវាចំណាយពេលតិច ប្រមាណកន្លះម៉ោងទៅ ១ ម៉ោងប៉ុណ្ណោះ ជាពិសេសយានដ្ឋានមួយចំនួនមិនមានគិតថ្លៃសេវាកម្មត្រួតពិនិត្យទេ ដូចនេះអ្នកនឹងទទួលបានរបាយការណ៍លម្អិតថាតើឡាននេះខូចត្រង់កន្លែងណាខ្លះ ដើម្បីងាយស្រួលវាយតម្លៃ និងសម្រេចចិត្តច្បាស់ថាគួរទិញ ឬមិនទិញ ។

5. តថ្លៃ

រូបមន្តនៅក្នុងការតថ្លៃគឺ យកតម្លៃទីផ្សារសមរម្យដែលអ្នកបានស្រាវជ្រាវ ដកតម្លៃជួសជុលដែលអ្នកប៉ាន់ស្មាន។ ឧទាហរណ៍ថា អ្នកស្រាវជ្រាវឃើញថាតម្លៃទីផ្សារដែលអាចទទួលយកបានគឺ ១០៥០០ ដុល្លារ​ ហើយថ្លៃជួសជុលប៉ាន់ស្មានគឺ ៥០០ ដុល្លារ អញ្ចឹងតម្លៃដែលអ្នកទទួលយកបានគឺ ១០០០០ ដុល្លារគត់ ។

រូបមន្តទី២ គឺ ២០/៨០ ។ ប្រសិនបើគេកាត់ថ្លៃ ១០០០០ ដុល្លារ អ្នកអាចតថ្លៃសល់ត្រឹម ៨០០០ ដុល្លារ ករណី ម្ចាស់ឡានមិនសុខចិត្តខាត ២០%ទេ គួរប្រើប្រើវិធិសាស្ត្រ ៥០/៥០ បន្តទៀត ដោយស្តាប់មើលថា ម្ចាស់ឡានអាចចុះបានប៉ុណ្ណា ឧទាហរណ៍ថាគេដាច់តម្លៃ ៩០០០ ដុល្លារ ដូចនេះ គម្លាតតម្លៃបស់អ្នក និងតម្លៃម្ចាស់ឡានគឺ ១០០០ ដុល្លារ ដូចនេះអ្នកអាចឡើង ៥០០ ដុល្លារ ឲ្យគេចុះ ៥០០ ដុល្លារ ហើយរកចំណុចប្រសព្វគ្នា។

…………………………………………………………………..

ដើម្បីទទួលបានព័ត៌មាន ចំណេះដឹង និងវីដេអូថ្មីៗទាក់ទងនឹងរថយន្ដសូម ៖

Follow Facebook Page : 👉 Advan Auto

Subscribe YouTube Channel : 👉Advan Auto

Follow TikTok : 👉Advan Auto

Follow Instagram : 👉Advan Auto