មានប្រវត្តិចាស់ឆ្នាំ ប្រហែលជាបងប្អូនបានស្គាល់ច្រើនហើយ ពិសេសពូៗអុំៗ ដែលមានអនុស្សាវរីយ៍ជាមួយនឹង រថយន្ដ Corolla ឆ្នាំ២០០០ ដល់ ២០០២នេះ។

បើនិយាយពីកម្រិតគុណភាព ធន់ សន្សំសំចៃ ទុកចិត្តលើវាចុះ សម្បូរគ្រឿងបន្លាស់់ ទោះជាងនៅចុងកាត់មាត់ញក់ណាក៏ចេះជួសជុលវាដែរ។

កម្មវិធីបទបង្ហាញរថយន្ដមួយទឹក នឹងលើកយកចំណុចខ្លះៗ ដែលមាននៅក្នុងខ្លួន Corolla ជំនាន់ទី៨នេះ ដែលមានអាយុ២០ឆ្នាំហើយក្ដី មកគាស់កកាយ ជូនបងប្អូន ថាតើនៅល្អប្រើអត់សម្រាប់ឆ្នាំ២០២២នេះ។

Corolla បំពាក់ម៉ាស៊ីន ៤ស៊ីឡាំង ចំណុះ ១.៨លីត្រ ផលិតកម្លាំង ១២៥ សេះ ប្រើប្រអប់លេខ ៤ វគ្គអូតូ បង្វិលកង់ដោយប៉ុងមុខ(FWD)​ រត់លឿនបំផុត ១៨៤ គីឡូម៉ែត្រ/ម៉ោង ជាន់ស្ទុះពី ០-១០០ គីឡូម៉ែត្រប្រើពេល ១១.៤ វិនាទី ចំពោះកម្រិតស៊ីសាំងខ្ទង់៦ ទៅ ៨លីត្រក្នុងមួយ ១០០គីឡូម៉ែត្រ។

ប្រព័ន្ធជើងក្រោមប្រើប្រភេទ បូមរឺស័រធម្មតា MacPherson Strut ទាំងមុខក្រោយ  ប្រើហ្វ្រាំងប្រភេទឌីសនៅកង់មុខ និងក្រោយប្រើហ្វ្រាំងតាំប៊ួរ ជំនួយដោយ ABS។

វាមិនជាទូលាយប៉ុន្មានទេ តែអាចប្រើលក្ខណៈគ្រួសារបាន និងសន្សំសំចៃបានច្រើនលើការចំណាយ។

តម្លៃស្លាកលេខក្នុងស្រុកចន្លោះពី ៥០០០ដុល្លារជាង ទៅ ៦០០០ដុល្លារ អាស្រ័យលើប្រភេទ និងភិនភាគជាក់ស្ដែង។

វាក៏សម្បូរគ្រឿងបន្លាស់ណាស់ ហើយធូរថ្លៃទៀតផង បើមានបញ្ហាជួសជុលខ្ទង់ ២០ដុល្លារ ទៅ ១០០ ដុល្លារជាងប៉ុណ្ណោះ។

តែបើសួរថានៅល្អប្រើអត់ ដូចជាមិនមានបញ្ហាអ្វីឡើយ អោយតែប៉ះចំឡានស្អាតគ្រាន់បើ ម៉ាស៊ីន ប្រអប់លេខ គ្រឿងក្នុង និងជើងក្រោមមិនទាន់រលួយ អាចរត់បានដូចគេឯងអញ្ចឹង គ្រាន់តែមិនមានអ្វីទំនើប ។ ហើយវានៅតែដើរតួនាទីយ៉ាងសំខាន់ សម្រាប់បងប្អូនដែលមានកម្រិតជីវភាពមធ្យម ចង់រកឡានជិះដឹកកូនចៅ ដើរលេងអី Corolla ជំនាន់ទី ៨នេះ អាចកំដរការរីករាយជូនបងប្អូនបាន៕

អត្ថបទ៖ BunSak