រថយន្ដ SUV របស់ Toyota ក្រៅតែពី ពពួក Land Cruiser និង Lexus LX គេក៏ឃើញមានម៉ូឌែលមួយទៀត ដែលផលិតក្នុងឆ្នាំប្រហាក់ប្រហែលគ្នានោះគឺ Toyota Fortuner។ ជាសិស្សប្អូនគេ ដែលទើបនិងចូលប្រឡូកឆ្នាំ២០០៥ ដល់២០១៥ ត្រូវបានគេចាត់ទុកជា ជំនាន់ទី១។ ក្នុងនោះដែរ ចាប់ពីរឆ្នាំ២០០៩ Toyota បានធ្វើកំណែទម្រង់ផ្នែកខ្លះៗ តែហាក់នៅយឺតនៅឡើយ។

ថ្ងៃនេះកម្មវិធី បទបង្ហាញរថយន្ដមួយទឹក នឹងលើកយក Fortuner ស៊េរីឆ្នាំ២០០៥ ដល់២០០៨ ព្រោះស្រុកខ្មែរយើង ក៏ឃើញសម្បូរជិះហូរហែរដែរ។ ចង់ដឹងថាវាមានលក្ខណៈពិសេសអ្វីខ្លះអត់ បានជាឆ្នាំខ្ពស់និងគេដែរ តែតម្លៃធូរបែបនេះ? តោះស្ដាប់ Advan Auto បកស្រាយត្រួសៗទាំងអស់គ្នា!  

ចំពោះរថយន្ដម៉ូឌែលនេះ បើនិយាយពីប្រភេទក្រដាស់ពន្ធវិញ ស្ទើគ្មានតែម្ដង ចំណែកតម្លៃស្លាកលេខ ក្នុងស្រុកពីរ ០៥ ទៅ០៨ ចន្លោះពី ១ម៉ឺនដុល្លារក្រាស់ ទៅ ២ម៉ឺនដុល្លារស្ដើង អាស្រ័យលើប្រភេទម៉ាស៊ីនតូច ធំ ពណ៌ ឆ្នាំផលិត និង ភិនភាគជាក់ស្ដែង។

ជា SUV ធន់មធ្យម មានតួរខ្លួនសាក់ស៊ីជាប្រភេទ Body-On-Frame ដែលធ្វើអោយរថយន្ដមួយនេះ មានកម្ពស់ពីដីមកបាត ៣១៤ម.ម ប្រវែង ៤៦៩៥ម.ម ទទឹង ១៨៤០ម.ម កម្ពស់រថយន្ដ ១៨៥០ និងទម្ងន់ ១៧១០(2WD) ទៅ ១៩៧០គីឡូក្រាម(4WD)។

ថ្វីត្បិតតែឆ្នាំរាងខ្ពស់ក្ដី តែការបំពាក់មុខងារក៏ដូចជា គ្រឿងផ្សំផ្សេងៗមានលក្ខណធម្មតាៗ ដូចជាចង្គៀងមុខ និងស្ដុបក្រោយ ប្រើប្រភេទ Halogen នៅឡើយទេ។  

ខាងក្នុងក៏មិនខុសគ្នាប៉ុន្មានដែរ ទ្វា៥ កៅអី៣ជួរ  ស្មើនិង៧កៅអី ចំពោះកៅអីជួរមុខ មិនមានប្រព័ន្ធអេឡិចត្រូនិចទេ គឺបញ្ជាមុខក្រោយ កាច់ដោយដៃ។ មិនជាទូលាយប៉ុន្មានទេ អាចជិះបានគ្នា៧-៨ នាក់អីដែរ តែសម្រាប់កៅអីកណ្ដាល មិនមានរន្ធម៉ាសុីនត្រជាក់ឡើយ ទាល់តែ ជួរទី៣ទើបមាន។ Option ខ្លះមានដំបូលបើក ខ្លះក៏អត់ និងមិនមាន អេក្រង់ LCD Monitor ឡើយ សម្រាប់មុខងាផ្សេងៗ បញ្ហាដោយប៉ូតុង ។  

Fortuner ក៏មានជាជម្រើសម៉ាស៊ីនសាំងនិងប្រភេទម៉ាស៊ូតផងដែរ ដែលស្រុកខ្មែរតែងប្រើដូចជា៖

+ម៉ាស៊ីនសាំង

-ម៉ាស៊ីន ៤ស៊ីឡាំង ចំណុះ ២.៧លីត្រ ផលិតម្លាំង ១៦០សេះ កម្លាំងរមួល ១៧៥ផោនហ្វីត ហៅថាម៉ាស៊ីនតូច។

ស៊ីសាំងជាមធ្យមចន្លោះពី ៩លីត្រ ទៅ ១២លីត្រ ក្នុង១០០គីឡូម៉ែត្រ ឬអាចលើសនេះ ទៅតាមការបើកបរជាក់ស្ដែង។

-ម៉ាស៊ីន ៦ស៊ីឡាំង មុខកាត់ ៤.០លីត្រ ផលិតកម្លាំង ២៣៨សេះ កម្លាំងរមួល ២៥០ផោនហ្វីត ប្រភេទម៉ាស៊ីនធំ។

ស៊ីសាំងគ្រាន់បើ ខ្ទង់១២លីត្រ ទៅ ១៧លីត្រក្នុង១០០គីឡូម៉ែត្រ និងប្រែប្រួលទៅតាមស្ថានផ្លូវជាដើម។  

+ម៉ាស៊ីនម៉ាស៊ូត

-ម៉ាស៊ីន ៤ស៊ីឡាំង ចំណុះ ២.៥លីត្រ ជំនួយដោយ Turbo ផលិតកម្លាំង ១៤២សេះ (ម៉ាស៊ីនតូច)

-និងប្រភេទម៉ាស៊ីន ៤ស៊ីឡាំងD-4D ចំណុះ៣.០លីត្រ ជំនួយដោយ Turbo ផលិតកម្លាំង ១៦០សេះ កម្លាំងរមួល ២៥២ផោនហ្វីត ប្រភេទម៉ាស៊ីនធំ។

កម្រិតស៊ីប្រេងជាមធ្យមចន្លោះពី ៩លីត្រ ទៅ ១៣លីត្រក្នុង១០០គីឡូម៉ែត្រ និងប្រែប្រួលទៅតាមស្ថានភាពជាក់ស្ដែង។  

ម៉ាស៊ីនទាំងពីរប្រភេទនេះ រត់ដោយប្រអប់លេខ ៤វគ្គអូតូ​ ៥វគ្គអូតូ និង៤វគ្គលេខដៃ បង្វិលកង់មានជម្រើស ប៉ុងមួយ(2WD) និងប៉ុងពីរ(4WD)។ចំពោះ 4WD គឺមិនទាន់ Update ទេ នៅប្រើជាលក្ខណៈលេខដៃនូវឡើយ។

ជើងក្រោមល្អ មិនចាញ់បងៗសេរ៊ីលើទេ ប្រើជាមួយនឹង ស្លាបប្រចៀវឌុប Double Wishbone នៅផ្នែកខាងមុខ និងខាងក្រោយជា Multi Link  ដែលធ្វើឲ្យការបើកបែប Off-road បត់បែនល្អ មិនសូវរលាក់ខ្លាំង ។ ភ្ជាប់មកជាមួយនឹង យ៉ាន់កង់ ទំហំ ១៦អីញ បំពាក់ហ្វាំងឌីសគៀបនៅផ្នែកខាងមុខ និងខាងក្រោយជាប្រភេទហ្វ្រាំងត្រលោក (Drum Brake) ជំនួយដោយប្រពន្ធ័ ABS ។  

និយាយរួមវាមិនមានអ្វីពិសេសប្លែកឡើយ ទោះឆ្នាំរាងខ្ពស់បន្ដិចមែនតែ Toyota មិនបានបំពាក់អ្វីច្រើនទេ ទាល់តែស៊េរីឆ្នាំ២០០៩ ទើបកែប្រែតិចតួចគួរសម។ ទោះមិនសូវស្អាតទំនើប តែខ្ពស់ស្រឡាស់ស្រួលជិះចុះខេត្ដចូលចំការអីដែរ ម្យ៉ាងទៀតកម្រិតស៊ីប្រេងគិតថាគួរសម មិនតិចក៏មិនច្រើន។ ចុះសម្រាប់បងប្អូនវិញ មានលុយម្ដុំប៉ុណ្ណឹង គិតថាចង់វិនិយោគ ជាមួយឡានឆ្នាំខ្ពស់ តែមិនទំនើបដូច Fortuner ជំនាន់ទី១នេះដែរអត់?  

អត្ថបទ៖ BunSak