Toyota នៅតែបន្ដរផលិតម៉ូឌែល Rav4 តាំងពីរឆ្នាំ១៩៩៥ រហូតដល់២០២២ ព្រោះប្រភេទ Crossover SUV ខ្នាតតូចមួយនេះទទួលបានការគាំទ្រ និងពេញនិយមខ្លាំង នៅទីផ្សារអាមេរិក អ៊ឺរ៉ុប និងអាស៊ីជាដើម។ នៅកម្ពុជាយើងក៏ឃើញមានវត្តមានដែរ ចាប់ពីឆ្នាំ៩៥ ដល់២០០៨ និងឆ្នាំ២០១២ ឡើងឃើញមានមួយៗ។

ថ្ងៃនេះ Advan Auto និងលើកយកចំណុចកែប្រែខ្លះៗ នៃលក្ខណៈទូទៅមួយចំនួន របស់ Rav4 ជំនាន់ទី៣ ដែលផលិតក្នុងឆ្នាំ ២០០៦ ដល់២០១១ ចំពោះស្រុកខ្មែរយើងភាគច្រើននាំចូលតែឆ្នាំ ២០០៦ ដល់២០០៨ តែប៉ុណ្ណោះ។

ម៉ាស៊ីនមានច្រើនជម្រើស ដោយឡែកនៅកម្ពុជាឃើញមានតែពីរប្រភេទទេ គឺម៉ាស៊ីន ៤ស៊ីឡាំង និង៦ស៊ីឡាំង។

ចំពោះម៉ាស៊ីន ៤ស៊ីឡាំងវិញ ចំណុះ ២.៤លីត្រ ផលិតកម្លាំង ១៦៦សេះ កម្លាំងរមួល ១៦៥ផោនហ្វីត រត់ដោយប្រអប់លេខ ៤វគ្គអូតូ បង្វិលកង់ដោយប្រភេទ ប៉ុងមួយ (2WD មានជំនួយដោយប្រព័ន្ធ LSD ) និងប៉ុងពីរ (4WD ជំនួយដោយប្រព័ន្ធ Differential Lock )។

កម្រិតស៊ីសាំង ក្នុងក្រុងស៊ី ១០លីត្រ និងក្រៅក្រុង ៨លីត្រ ក្នុង១០០គីឡូម៉ែត្រ សម្រាប់ប្រភេទប៉ុងមួយ។

សម្រាប់ប៉ុងពីរ ក្នុងក្រុង ៩.៥លីត្រ និងក្រៅក្រុងផ្លូវលាត សុី១២លីត្រ ក្នុង១០០គីឡូម៉ែត្រ។

ម៉ាស៊ីន ៦ស៊ីឡាំង តម្រៀបជាអក្សរ V មុខកាត់ ៣.៥លីត្រ ផលិតកម្លាំង ២៦៩សេះ កម្លាំងរមួល ២៤៦ផោនហ្វីត រត់ដោយប្រអប់លេខ ៥វគ្គអូតូ បង្វិកកង់ដោយ ប៉ុងមួយ(2WD) និងប៉ុងពីរ(4WD) ដូចគ្នា។

ស៊ីសាំងចន្លោះពី ១២.៣លីត្រក្នុងក្រុង និងក្រៅក្រុង ៨.៧លីត្រក្នុង១០០គីឡូម៉ែត្រសម្រាប់ប៉ុងមួយ។

ចំណែកប៉ុងពីរមិនលើសគ្នាប៉ុន្មានទេ ១៣លីត្រក្នុងក្រុង និង៩លីត្រ ក្រៅក្រុងផ្លូវលាត។

ជើងក្រោមគ្រាន់បើជាងជំនាន់មុន ខាងមុខប្រើជាប៉ូមរុឺស័រ MacPherson Strut ខាងក្រោយ ស្លាបប្រចៀវឌុប Double Wishbone និងបំពាក់បន្ថែមប្រព័ន្ធ ឯករាជ Independent Suspension ទាំងមុខក្រោយ ធ្វើអោយជើងក្រោមរបស់ Rav4 មានលំណឹងល្អ ទន់ស្រួលមិនសូវរលាក់។ គួបផ្សំជាមួយយ៉ានកង់ ១៦អីញ បំពាក់ហ្វ្រាំងឌីសគៀប ទាំងមុខក្រោយ ជំនួយដោយប្រព័ន្ធ ABS ភ្ជាប់កង់ទាំងបួន ចំពោះការចាប់ហ្វ្រាំង គឺបត់បែនបានល្អ និងសុវត្ថិភាពខ្ពស់់ ទោះបើកបរលឿនក៏ដោយ។

ជាមួយនិងប្រវែង ៤៦០០ម.ម ទទឹង ១៨៨៥ម.ម កម្ពស់ ១៧៥៥ម.ម ពីដីមកបាត ១៩០ម.ម និងទម្ងន់ធ្ងន់ដល់ទៅ ១៥៧០គីឡូក្រាមឯណោះ។

ការឌីស្សាញបែបទាន់សម័យ ទាំងមុខក្រោយមើលទៅសមសួន​ និងរាងមាំជាងមុន ពិសេសចង្កៀងមុខ និងស្ដុបក្រោយប្រើជា LED ភ្លឺច្បាស់គ្រានបើដែរ។ តែនៅរក្សាទម្រង់ចាស់ដដែលគឺ ទ្វារក្រោយបើកចំហៀងដែលភ្ជាប់កង់សាគួរ មិនងអោយច្រឡំគេតែម្ដង។

ខាងក្នុងរាងប្លែក កុំឃើញតូចប៉ុណ្ណឹង តែមានជម្រើសប្រភេទ កៅអី៥ និង៧កៅអី ចំពោះចង្កូតវិញប្រើប្រភេទ Titl-Telescopic អាចទម្លាក់តម្លើងបាន និងជាអេឡិចត្រនិក EPS ធូរស្រួលក្នុងការបតបែន។ ខាងក្នុងបំពាក់ក្រណាត់លាយផ្លាស់ស្ទិច និងមុខងាជាច្រើនបញ្ជាដោយប៉ូតុងចុច និងមូលឡើងចុះ។

Rav4 បែបចែក Option ជាបីដូចជា៖ Base, Sport, និង Limited (Sport, Limited មានកៅអីបីជួរ) Base Option ជាប្រភេទធម្មតា និងប្រើយាន់កង់​ ១៦អីញ ចំពោះ Sport វិញរាងគ្រាន់ ប្រើយាន់១៨អីញ បំពាក់ជើងក្រោមជា Sport Turn Suspension, កញ្ចក់ក្រោយកាត់ចំណាំងផ្លាត, ពិលកាង និងដំបូលបើកជាដើម។ ចំពោះ Limited បន្ថែមជាមួយ ពោងសុវត្ថិភាព ៨, Speaker JBL 7គ្រាប់, ប្រើយាន់ ១៧អីញ, កៅអីស្បែក ប្រើប្រព័ន្ធអេឡិចត្រនិក ជំនួយដោយ Lumbar Support, និង DVD សម្រាប់អ្នកដំណើរក្រោយ។

តម្លៃនៅស្រុកខ្មែរចន្លោះពី ១៨០០០ដុល្លារជាង ទៅ២២០០០ដុល្លារ អាស្រ័យលើឆ្នាំផលិត ពណ៌ Option និងភិនភាគជាក់ស្ដែងជាដើម។

សម្រាប់ជំនាន់ទី៣នេះ មានការផ្លាស់ប្ដូរច្រើន ទាំងរូបរាងមើលទៅស្អាតជាងមុន និងខាងក្នុងក៏ប្លែក ពិសេសបន្ថែម កៅអីជួរទី៣។

តម្លៃរាងគួរសមដែរ តែប្រើប្រាស់ធន់ ជើងក្រោមជិះស្រួល និងអាចទៅបានស្ទើរតែគ្រាប់ឧបសគ្គផ្លូវស្រុកខ្មែរតែម្ដង។ សម្រាប់បងប្អូនដែលមានសមាជិកគ្រួសារច្រើន ៦ទៅ៧នាក់ មានថវិកាខ្ទង់២ម៉ឺនដុល្លារ ចង់ប្រើឡានធន់សន្សំសំចៃ អាចពិចារណា Rav4​ ជំនាន់ទី៣នេះបាន៕

អត្ថបទ៖ BunSak