Toyota Tacoma ជារថយន្ដ មួយក្នុងចំណោម ឡាន Pick Up ប្រភេទដឹកផ្សេងៗទៀត​ដែលពេញនិយមនៅ កម្ពុជា។ ភាគច្រើនបងប្អូនតាមបណ្ដាខេត្ត តែងតែប្រើវាជាលក្ខណៈគ្រួសារ និងសម្រាប់សម្រួលដល់ការងារដឹកជញ្ញូន មួយចំនួនជាដើម។ ព្រោះទ្រុងខាងក្រោយទូលាយ​ល្អសម្រាប់ដឹកឥវ៉ាន់ ដែលអាចផ្ទុកទម្ងន់បាន ៧០០គីឡូក្រាម​ និងសន្ដោងទម្ងន់បន្ថែម ១៥០០គីឡូក្រាមបន្ថែមទៀត។  

វាមានប្រវែងបណ្តោយ ៥៦២១ម.ម ទទឹង ១៨៩៥ម.ម  កម្ពស់ ១៧៨០ម.ម ពីដីដល់បាតឡានប្រមាណ ២៣ ស.ម និងទម្ងន់ ១៧៩០ គីឡូក្រាម។

Tacoma បំពាក់ម៉ាស៊ីន ៦ស៊ីឡាំង មុខកាត់ស៊ីឡាំង ៤.០លីត្រ បង្កើនកម្លាំង ២៤៥ សេះ កម្លាំងរមួល ២៨២ ល្បឿនលឿនបំផុត ២៣០គីឡូ/ម៉ោង ប្រើប្រអប់លេខ ៦ វគ្គអូតូ បំពាក់ប៉ុងដែលជំនួយដោយអេឡិចត្រូនិក កាប់ពីតាស រត់ដោយប៉ុងក្រោយ (RWD) និងមានជម្រើសប៉ុងពីរ (4WD) ។  

កម្រិតស៊ីសាំងវិញចេញពីរោងចក្រ កាលជិត២០ឆ្នាំមុន ការបើកបរក្នុងក្រុង ១៧លីត្រ និងក្រៅក្រុង ១៣លីត្រ ក្នុង១០០គីឡូម៉ែត្រ។

សម្រាប់បច្ចុប្បន្នបទពិសោធ៍ពីរនាក់ប្រើផ្ទាល់ ក្នុង១០០គីឡូម៉ែត្រ ស៊ីខ្ទង់១៤លីត្រ ១៨លីត្រ ឬអាចលើសនេះ និងប្រែប្រួលទៅតាមស្ថានភាពជាក់ស្ដែង។  

ប្រព័ន្ធជើងក្រោម​ Tacoma ០៥ ប្រើជើងក្រោមខាងមុខបំពាក់ស្លាបប្រចៀវឌុប (Double Wishbone) ខាងក្រោយប្រើជាមួយនិងជន្ទៀស (​Leaf Spring) ដើម្បីដឹកទម្ងន់បានច្រើន ក៏ប៉ុន្តែសម្រាប់ការបើកបរលើផ្លូវធម្មតា មិនមានដឹកទម្ងន់ធ្ងន់ វាអាចនឹងរលាក់ឬលោត។ ប្រើយ៉ាន់កង់ ទំហំ ១៨អុីញ បំពាក់ហ្វ្រាំងឌីសគៀបនៅខាងមុខ និងផ្នែកខាងក្រោយជាហ្វ្រាំងត្រឡោក  ជំនួយដោយប្រព័ន្ធ ABS​ ។  

ហេតុផល ៥ចំណុច ចំពោះគុណវិបត្តិ ដែលអ្នកប្រើតែងលើកឡើងមានដូចជា៖

- ជាឡានដែលចាស់ឆ្នាំ ស៊ីសាំងកាន់តែច្រើនជាងធម្មតា

-ចាប់ពីឆ្នាំ២០១១ចុះក្រោម មិនមានអ្វីដែលពិសេសប្លែកឡើយ គ្រឿងក្នុងបំពាក់តែឧបករណ៍ធម្មតាៗ(ចំពោះប្រភេទ TRD Sport ឡើងទើបផ្លាស់ប្ដូរតិចតួច)

-ជិះអត់ស្រួលប៉ុន្មានទេ រលាក់គួរសម

-ឧស្សាហ៍មានបញ្ហា លាន់សម្លេងនៅប៉ូមខាងមុខ ភាគច្រើនដាច់កៅស៊ូ អាប៉ូស៊េរជាដើម។-តម្លៃនៅថ្លៃ ពេលលក់វិញខាតច្រើនគួរសម  

តែចំពោះបងប្អូនដែលស្រលាញ់ និងត្រៀមចិត្តចំពោះហេតុផលទាំងអស់នេះហើយ Tacoma​ ជំនាន់ទី២នេះ នៅតែអាចកំដរបងប្អូន និងជួយសម្រួលកិច្ចការងារមួយចំនួនជូនបងប្អូនបាន៕  

អត្ថបទ៖ BunSak