ឡាន Pick Up ដឹកទំនិញស៊េរីក្រោមៗឃើញមានតែ Tacoma នេះទេ ដែលពេញនិយម និងតម្លៃទីផ្សារនៅតែខ្ពស់ដ៏ដែល បើធៀបនឹង Pick up ឆ្នាំ២០០១​ ដល់២០០៤ ដូចគ្នាផ្សេងទៀត។ ព្រោះតែភាពធន់ រឹងមាំ កម្លាំងខ្លាំង រត់ណឹងបានល្អ ទើប Toyota Tacoma នេះអាចឈរជើងបានយូរអង្វែងក្នុងទីផ្សារ ឡាននៅកម្ពុជា ទោះមានអាយុកាល ២០ឆ្នាំហើយក្ដី។

ដែលតម្លៃបច្ចុប្បន្នស៊េរីឆ្នាំ២០០១ ដល់២០០៤ ចន្លោះពី ៩០០០ដុល្លារជាង ទៅ១៣០០០ដុល្លារ អាស្រ័យលើ ប្រភេទ ភិនភាគជាក់ស្ដែង និងឆ្នាំផលិតជាដើម។

បំពាក់មាស៊ីន​ ៤ ស៊ីឡាំង ២.៤លីត្រ​ ផលិតកម្លាំង ១៤២សេះ កម្លាំងរមួល ១៦០ ផោនហ្វីត ល្បឿនលឿនបំផុត ១៨៥ គីឡូមែត្រ/ម៉ោង និង មានជម្រើស ៦ស៊ីឡាំង​ មុខកាត់ស៊ីឡាំង ៣.៤លីត្រ ផលិតកម្លាំង ១៩០សេះ កម្លាំងរមួល ២២០ ផោនហ្វីត ល្បឿនលឿនបំផុត ២១១គីឡូមែត្រ/ម៉ោង។ វាស៊ីសាំងជាមធ្យម ១២លីត្រ ទៅ ១៤លីត្រ ក្នុង ១០០គីឡូមែត្រ ឬច្រើនជាងនេះទៅតាមការប្រើប្រាស់ជាក់ស្ដែង។

Toyota Tacoma ឆ្នាំ២០០១ ដល់ឆ្នាំ២០០៤ មានទាំងប្រភេទ រត់ដោយប៉ុង១ និងប៉ុង២ ខ្ពស់ទាប ទ្រុងវែងខ្លី ទ្វា ២ និងទ្វា ៤ ប្រលេខ ៤ វគ្គ ៥ វគ្គអូតូ និងជម្រើសលេខដៃ។

ប្រព័ន្ធជើងក្រោមវិញ Tacoma ឆ្នាំចាស់ជំនាន់ទីមួយមិនអន់ប៉ុន្មានទេ យ៉ាន់កង់តូច ១៤ អីញ បំពាក់ ABS ហ្វ្រាំងគៀបខាងមុខ និងខាងក្រោយប្រភេទហ្វ្រាំងស្គរ ។ ជើងក្រោមខាងមុខ ពាក់ស្លាបប្រចៀវឌុប (double whisbon ) និងខាងក្រោយប្រភេទចន្ទៀស (Leaf) ទប់ទល់លើការដឹកទំនិញច្រើន។

ភិនភាគខាងក្រៅវិញ ប្រើចង្កៀងធម្មតាប្រភេទ Halogen  ទទឹង ១៧៨១ ម.ម បណ្ដោយ ៥១៣៨ម.ម ទ្រុងខាងក្រោយ ប្រវែង ១៤៥៥ម.ម កម្ពស់ ១៧១៥ម.ម ពីដីមកបាត ២១៥ម.ម ទម្ងន់១២០០គីឡូក្រាម ខាងក្រោយដឹកបានច្រើនគួរសម ៨០០គីឡូក្រាម និងសណ្ដោងបាន ១៦០០ គីឡូក្រាមថែមទៀត។

ផ្នែកខាងក្នុង ជាឡាន Pick Up ដឹកទំនិញចាស់ឆ្នាំ មិនមានអ្វីដែលប្លែកទេ មានកៅអី២ជួរ ទូលាយល្មម អាចជិះគ្នា៥ នាក់អីដែរ ។

ចំពោះ Tacoma ជំនាន់ទីមួយ

រាងចាស់ឆ្នាំមែន តែនៅអាចប្រើការបាន មិនជាបញ្ហាអ្វីទេអោយតែប៉ះឡានស្អាត ។ ពិសេសតម្រូវការរបស់បងប្អូនដែលមានថវិកាខ្ទង់ ១ម៉ឺនដុល្លារ ចង់បានឡាន Pick Up សម្រាប់ដឹកទំនិញ ជិតឆ្ងាញ Tacoma នេះស័ក្កសមអាចពិចារណាបាន។ គ្រាន់តែឡានចាស់ឆ្នាំបែបនេះ រាងសុីសាំងបន្ដិចហើយ អាស្រ័យតាមម៉ាសុីនជាក់ស្ដែង អញ្ចឹងពេលទិញប្រើត្រូវពិនិត្យអោយល្អិតល្អន់បន្ដិច ទើបប្រើមិនស្ដាយលុយ៕

អត្ថបទ៖ BunSak