និយាយពីឡានស៊ីសាំងតិច គេតែងនឹកឃើញអាព្រូសមុនគេ តែកុំភ្លេចថារស់ក្នុងគ្រួសារតែមួយ ចេញពីត្រកូល Toyota ដូចគ្នាតែហាក់ដូចជាមិនសូវមាននរណាស្គាល់ច្រើន នោះគឺ Toyota Vitz ឬ Yaris នេះឯង។

គួរបញ្ជាក់ថា Toyota Vitz ជាឈ្មោះប្រើនៅក្នុងទីផ្សារជប៉ុន ដែលជាស្រុកកំណើតរបស់វា ចំណែកឯឈ្មោះថា Yaris ប្រើនៅទីផ្សារអន្តរជាតិ ខណៈដែលឡានមួយនេះ ត្រូវបាននាំចូលស្រុកខ្មែរពីទីផ្សារជប៉ុនតែម្តង ។

Vitz មិនតូចចិត្តទេ ទោះបីរូបរាងខាងក្រៅ និងខាងក្នុងមិនសូវជាស៊ីវិល័យ ដូច Prius ពិតមែន តែក៏មានបំពាក់ Smart key នឹង ប៉ូតុង Power Start ផងដែរ។ បើនិយាយពីកម្រិតសុីសាំង និងការបើកហែលទឹក នៅរដូវភ្លៀងនេះវិញប្រហែលជាព្រូសត្រូវអែបគៀនសិនហើយ។

Vitz ឬ Yaris ត្រូវបាន Toyota ផលិត៖

• ក្នុងជំនាន់ទី១ នៅឆ្នាំ១៩៩៩ ដល់ ២០០៥ 
• ជំនាន់ទី២ ២០០៦ ដល់២០១១ 
• និងជំនាន់ទី៣ ២០១២ ដល់២០១៩

ចំពោះស្រុកខ្មែរភាគច្រើន ដែលនាំចូលមកជាជំនាន់ទី២ ស៊េរីឆ្នាំ ២០០៦ ដល់​២០១១ មានតម្លៃចន្លោះពី ៧០០០ដុល្លារជាង ទៅ១០០០០ដុល្លារជាង អាស្រ័យតាមប្រភេទស្លាកលេខ និងក្រដាស់ពន្ធជាដើម។ ចំណាយក្នុងការថែទាំនិងជួសជុលខ្ទង់ ៣០ដុល្លារ ទៅ២០០ដុល្លារជាង ផ្អែកលើស្ថានភាពជាក់ស្តែង ។ Toyota Vitz ជាប្រភេទ Hatchback ទ្វា៤ កៅអីធម្មតា ២ជួរ អាចជិះបានគ្នា៥ និងសល់ឃ្លុបក្រោយសម្រាប់ដាក់ឥវ៉ាន់បានគួរសមដែរ។

ប្រវែង ៣៧៥០ម.ម ទទឹង ១៦៩៥ម.ម កម្ពស់ ១៥២០ម.ម ពីដីមកបាត ១៥៤ម.ម និងមានទម្ងន់ស្រាល ៩៨០គីឡូក្រាម។

ជម្រើសម៉ាសុីនមានច្រើន តែសូមនិយាយតែប្រភេទម៉ាសុីនដែលស្រុកខ្មែរសម្បូរប្រើជាងគេ រួមមាន៖

ម៉ាសុីន ៣ស៊ីឡាំង ចំណុះ១.០លីត្រ ផលិតកម្លាំងបាន ៧០សេះ ប្រអប់លេខ ៤វគ្គអូតូ បង្វិលកង់ដោយប៉ុងមុខ (FWD)។ លេងយ៉ានកង់ ១៥អីញ ប្រើហ្វាំ្រឌីសគៀបនៅផ្នែកខាងមុខ និងខាងក្រោយជាប្រភេទ ហ្រ្វាំងតាំប៉ួរ ជំនួយដោយប្រព័ន្ធ ABS អាចរត់លឿនបំផុតបាន ១៨០គីឡូម៉ែត្រ/ម៉ោង។

ចំពោះកម្រិតស៊ីសាំងវិញ ការបើកបរក្នុងក្រុងខ្ទង់ ៦លីត្រជាង និងក្រៅក្រុងផ្លូវលាត​ ៥លីត្រ ក្នុង១០០គីឡូម៉ែត្រ។

សូមបញ្ជាក់ផងដែរថា Toyota Viz បើជាប្រភេទ Full Option ទើបបំពាក់មកជាមួយនៅ ប្រព័ន្ធហ្វ្រាំង ABS ពោងសុវត្ថិភាព ៨ គ្រាប់, ប៉ូតុង Power Start, Smart Key ២គ្រាប់ និង Parking Sensor កៅអីកំដៅ ជាដើម។

សរុបមក ទាំងតម្លៃ កម្លាំងម៉ាស៊ីន កម្រិតស៊ីសាំង និងប្រព័ន្ធមួយចំនួនដែលបំពាក់មកជាមួយ គួរសមអាចទទួលយកបានតែមិនដឹងថាបងប្អូនស្រលាញ់ពេញចិត្តរូបរាងឡានប្រភេទ គូទហើមបែបនេះដែរអត់។ បើសម្រាប់តែប្រើប្រាស់ធម្មតា មិនជាបញ្ហាឡើយ ព្រោះសន្សំសំចៃ គួរសម ហើយធន់ទៀត។

អត្ថបទ៖ BunSak