ចុច Subscribe Channel Telegram របស់ Advan Auto ដើម្បីទទួលបានព័ត៌មាន ចំណេះដឹង និងការកំសាន្ដថ្មីៗអំពីរថយន្ដ

ហ្រ្វាំង ជាផ្នែកមួយជួយការពារសុវត្ថិភាពអ្នក និងបញ្ជៀសពីគ្រោះថ្នាក់ផ្សេងៗ ប៉ុន្តែម្ចាស់ឡានជាច្រើនប្រហែលជាមិនបានចាប់អារម្មណ៍ថែទាំប្រព័ន្ធហ្រ្វាំងឲ្យបានដិតដល់នោះទេ រហូតដល់ម្ចាស់ឡានខ្លះប្រើហ្វ្រាំងទាល់តែខូច ស៊ីដាច់ទាំងថាសតាំបួរ ដូចច្នោះពួកគាត់ត្រូវចំណាយលុយច្រើនដើម្បីធ្វើការជួសជុល ហើយថែមទាំងប្រឈមគ្រោះថ្នាក់ច្រើនទៀតផង 

តើពេលណាដែលអ្នកគួរឆែកមើលស្បែកហ្រ្វាំងឡាន?

ការពិតទៅវាមិនមានកាលវិភាគច្បាស់លាស់ទេ គឺវាស៊ីសងទៅតាមការប្រើប្រាស់ជាក់ស្តែង ថាតើអ្នកប្រើក្នុងក្រុងច្រើន ឬចេញទៅខេត្តច្រើន? ប៉ុន្តែបើតាមអ្នកជំនាញ បានណែនាំឲ្យម្ចាស់ឡានទាំងអស់គួរយកឡានទៅឆែកមើលប្រព័ន្ធហ្រ្វាំង យ៉ាងហោចណាស់រៀងរាល់ ៦ ខែម្តង បើទោះជាហ្រ្វាំងឡានអ្នកមិនមានបញ្ហាអ្វីក៏ដោយ ។ មួយវិញទៀត រាល់ពេលដែលអ្នកយកឡានទៅត្រឡប់កង់ អ្នកគួរតែឆែកមើលប្រព័ន្ធហ្រ្វាំងឡានផងដែរ ។ 

តើគួរឆែកប្រព័ន្ធហ្រ្វាំងឡានយ៉ាងម៉េច?

1. បៀបឆែកនៅពេលដែលអ្នកកំពុងបើកឡាន

• នៅពេលដែលអ្នកជាន់ហ្រ្វាំង ស្រាប់តែឮសម្លេងរំខាន របៀបថា មានសម្លេងកកិតដែកខ្លាំងៗ នោះមានន័យថា ឡានអ្នកអស់ស្បែកហ្រ្វាំងហើយ ដូចនេះគួរតែយកទៅឲ្យជាងដូរចេញឲ្យហើយទៅ ដោយឡែកចំពោះករណីដែលដូររួចនៅតែលឺសម្លេងមានន័យថាប្រព័ន្ធហ្រ្វាំងឡានអ្នកគឺមានបញ្ហា​​​ នឹងត្រូវការការជួសជុល
• ករណីមួយទៀតប្រសិនបើពេលជាន់ហ្រ្វាំង ស្រាប់តែញ័រឈ្នាន់ហ្រ្វាំង ឬក៏ចង្កូតឡាន វាក៏ជាសញ្ញាដែលបញ្ចាក់ថាស្បែកហ្រ្វាំងមានបញ្ហាដែរ ដូចនេះគួរតែប្រញាប់យកទៅអោយអ្នកជំនាញត្រួតពិនិត្យមើលកាន់តែឆាប់កាន់តែប្រសើរ
• បើសិនជាមានសញ្ញាឆេក Brake warning light នៅក្នុងកុងទ័រ ដូចនៅក្នុងវីដីអូនេះ​ លោតនៅពេលយើងបើករបរ​ វាក៏អាចជាសញ្ញាបញ្ជាក់ថា ហ្រ្វាំងឡានមានបញ្ហាផងដែរ បើតាមអ្នកបច្ចេកទេសគឺប្រហែលជាស្ទើរប្រេងហ្វ្រាំង ដូចនេះអ្នកគួរយកចូលជាងឆែកមើលដូចគ្នា

2. របៀបមើលដោយផ្ទាល់ភ្នែក

• ជាទូទៅថាសតាំបួររបស់ឡានណាក៏មានជាប់ជ្រះតិចតួចដែរ ប៉ុន្តែបើសិនអ្នកសង្កេតឃើញថា ថាសតាំបួរស្រាប់តែរលោងស្អាត ឬក៏មានជ្រះខ្លាំងខុសពីធម្មតា មានស្នាមក្រវេមក្រវ៉ាមខ្លាំង នោះក៏ជាសញ្ញាបញ្ជាក់ថា ហ្រ្វាំងមានបញ្ហាដែរ 
• មួយវិញទៀត អ្នកអាចមើលកម្រាស់ស្បែកហ្រ្វាំងផ្ទាល់ ប្រសិនបើអ្នកមើលឃើញកម្រាស់ស្បែកហ្រ្វាំងនៅស្តើងប្រមាណ ៦ ម.ម ឬក៏សឹកអស់ចង្អូរកណ្តាល នោះបញ្ជាក់ថា ស្បែកហ្រ្វាំងសឹកជិតអស់ហើយ

តើពេលណាដែលអ្នក គួរដូរស្បែកហ្រ្វាំងឡានចេញ?

ចម្លើយនោះគឺ

• នៅពេលដែលជាន់ទៅលឺសម្លេងខុសធម្មតា
• នៅពេលជាន់ហ្រ្វាំងហើយញ័រឈ្នាន់ហ្រ្វាំង
• នៅពេលជាន់ហ្រ្វាំង ស្រាប់តែឡានឈប់ក្នុងរយៈចម្ងាយឆ្ងាយជាងធម្មតា
• នៅពេលដែលឈ្នាន់ហ្រ្វាំងអ្នកធូរជាងធម្មតា
• ពេលជាន់ហ្រ្វាំង ឡានវេរឬទាញមកម្ខាង
• ស្បែកហ្រ្វាំងមើលទៅសល់កម្រាស់ស្តើង

ទាំងអស់នេះជាចំណុចសំខាន់ដែលអ្នកគួរយកចិត្តទុក ដើម្បីធានាសុវត្ថិភាពក្នុងការបើកបរ។ 

…………………………………………………………………..

ដើម្បីទទួលបានព័ត៌មាន ចំណេះដឹង និងវីដេអូថ្មីៗទាក់ទងនឹងរថយន្ដសូម ៖

Follow Page : 👉 Advan Auto 

Subscribe Channel : 👉Advan Auto 

Follow TikTok : 👉Advan Auto 

Follow Instagram : 👉Advan Auto