ជាការពិតណាស់ តម្លៃទីផ្សាររថយន្ដនៅស្រុកខ្មែរមួយចំនួន មានការឡើងចុះទៅតាមតម្លៃឥន្ធនៈ ឡានខ្លះពេលសាំងឡើយថ្លៃ តម្លៃថយចុះ ទីផ្សារក៏មិនសូវជាពេញនិយម ចំណែកឡានខ្លះទៀត តម្លៃសាំងថយចុះ បែបជាហក់ឡើយវិញគួរឲ្យកត់សម្គាល់។ 

សម្រាប់រថយន្ដ RX330 វិញតម្លៃនៅតែថយចុះ តែទីផ្សារដូចជារស់ឡើយវិញ ខណៈតម្លៃសាំងនៅខ្ពស់ធម្មតាដូចមុន ហេតុអ្វី? ចំពោះរឿងនេះ អាចមកពីកត្ដាមួយចំនួនដែលធ្វើឲ្យទីផ្សាររបស់ RX330 ដើរទៅមុខ បើទោះបីជាតម្លៃខ្លួនវ៉ៃចេញមិនសូវបានថ្លៃដូចមុនក៏ដោយ។ 

បងប្អូនប្រហែលជាដឹងហើយថា ត្រកូល RX មួយនេះ ក្នុងបរិបទស្រុកខ្មែរ គឺជាប្រភេទឡានលំដាប់ Luxury Car ដ៏ពេញនិយមមួយ រូបរាងទាក់ទាញ ខាងក្នុងទូលាយ ម៉ាស៊ីនខ្លាំងជាន់ស្មូតល្អ ជើងក្រោមហាប់ណែន ហើយក៏ជាប្រភេទឡាន Crossover SUV ដែលអាចរត់បានស្ទើគ្រប់ស្ថានភាពផ្លូវផងដែរ។

អាចមានមូលហេតុតែមួយប៉ុណ្ណោះ ដែលទីផ្សាររបស់ RX330 នៅតែដើរវិញបាននោះគឺ តម្លៃធូរជាងមុនជិតពាក់កណ្ដាល បើធៀបនឹង ៣ឆ្នាំមុន។ កាលសាំងនៅតម្លៃខ្ទង់ ៣,០០០រៀលជាងក្នុង ១លីត្រ RX330 នេះនៅចន្លោះពី ២ម៉ឺនក្រាស់ ទៅ ៣ម៉ឺនដុល្លារក្រាស់​ អាស្រ័យលើប្រភេទស្លាកលេខ ក្រដាសពន្ធ ពណ៌ Option និងភិនភាគជាក់ស្ដែង។

តែបច្ចុប្បន្នសាំងនៅលើ ៤,០០០រៀលក្នុង ១លីត្រ ចង់ជិះ RX330 កាន់ខ្ទង់ ១ម៉ឺនដុល្លារក្រាស់ ទៅ ២ម៉ឺនដុល្លារស្ដើង ទិញបានឡានស្អាតជិះហើយ។ សម្រាប់ក្រដាសពន្ធក៏មិនជាថ្លៃពេកដូចមុនដែរ នៅខ្ទង់ ២ម៉ឺនក្រាស់អីបានសុទ្ធតែលំដាប់មេឡានតែម្ដង។  

ដោយសារតែតម្លៃធូរបែបនេះហើយ ទើបបងប្អូនយើងខ្លះគាត់អាចពិចារណា ទៅលើប្រភេទឡានដែលធន់ក្នុងការប្រើប្រាស់ ខ្ពស់ស្រឡាស់ទំនើបគួរសម តម្លៃខ្ទង់ ១ម៉ឺនដុល្លារក្រាស់ ទៅ ២ម៉ឺនស្ដើង RX330 ក៏តែជាឡានមួយទឹក ស្ថិនក្នុងចំណោមឡានផ្សេងៗទៀត ដែលទីផ្សារកំពុងត្រូវប៉ាន់ ពិសេសមុនចូលឆ្នាំខ្មែរខាងមុននេះ។

គួរបញ្ចាក់ដែរថា Lexus RX330 បំពាក់ម៉ាស៊ីន ៦ស៊ីឡាំង ៣.៣ លីត្រ ផលិតកម្លាំងបាន ២៣០សេះ កម្លាំងរមួល ២៣៨ផោនហ្វីត ល្បឿនលឿនបំផុត ​២២៥គីឡូម៉ែត្រ/ម៉ោង ជាន់ស្ទុះពី ០ ទៅ ១០០ម៉ែត្រប្រើពេល ៨.១វិនាទី។ ប្រើប្រអប់លេខ ៥ វគ្គអូតូ បង្វិលកង់ដោយប្រភេទប៉ុងមួយ (FWD) និងប៉ុងពីរ (AWD) ជាមួយកម្រិតស៊ីសាំងជាក់ស្ដែងបច្ចុប្បន្ននេះវិញ ចន្លោះពី ១៣លីត្រ ទៅ១៦លីត្រ ក្នុង១០០គីឡូម៉ែត្រ ឬអាចលើសខ្វះតិចតួចតាមស្ថានភាពជាក់ស្ដែង។

សម្រាប់បងប្អូនវិញយល់យ៉ាងណាដែរចំពោះ Lexus RX330 មួយនេះ? សម្រាប់បងប្អូនដែលមានមតិយោបល់ នឹងបទពិសោធន៍ អាចចែករំលែកបាន៕

ដោយ៖ Bunsak 

*អត្ថបទនេះរក្សាសិទ្ធដោយ Advanced Auto Digital Media Co.,LTD ©2023

*ADVAN AUTO មិនគាំទ្រការចម្លងអត្ថបទទៅប្រើប្រាស់ឡើងវិញដោយគ្មានអនុញ្ញាតិនោះទេ។

*ជាការជូនដំណឹងនិងព្រមានទៅកាន់បុគ្គលទាំងឡាយណាដែលចម្លងអត្ថបទយើងយកទៅប្រើប្រាស់ដើម្បីប្រយោជន៍ផ្ទាល់ខ្លួន សូមបញ្ឈប់សកម្មភាពជាបន្ទាន់ សូមអរគុណ!