ប្រេនរថយន្ដអគ្គិសនីថ្មីមួយទៀតហើយ ដើមកំណើតពីសហរដ្ឋអាមេរិក ប្រកាសបង្ហាញមុខរថយន្ដអគ្គិសនីម៉ូដែលទំនើបរបស់ខ្លួន ជាមួយសមត្ថភាព និងតម្លៃសមរម្យ បំណង មកប្រកួតប្រជែង ដេញទីផ្សារជាមួយ Tesla ។ 

រថយន្ដម៉ាកសញ្ញាថ្មីនេះ មានឈ្មោះថា Fisker PEAR មកពីក្រុមហ៊ុនដើមកំណើតអាមេរិក Fisker Inc មានស្ថាបនិក លោក Henrik Fisker ដែលធ្លាប់ជាអតីតអ្នករចនាម៉ូដឡានទំនើបជាច្រើន រួមមាន BMW Z8, Aston Martin DB9, ជាពិសេស គាត់ធ្លាប់ជាអ្នករចនាម៉ូដឡាន Tesla Model S តែម្ដង។

ដោយសារតែឃើញវិស័យឡានអគ្គិសនី រីកចម្រើនខ្លាំង​លោកក៏សម្រេចបង្កើតក្រុមហ៊ុនខ្លួនឯង​ ដោយម៉ូដែលដំបូងជាប្រភេទ Hybrid ឈ្មោះថា Fisker Karma ដែលមិនសូវជាមានការគាំទ្រប៉ុន្មានោះទេ តែ ឆ្នាំ ២០១៦ ម៉ូដែលទី ២ Fisker Ocean ជាឡានអគ្គិសនី ទទួលបានការចាប់អារម្មណ៍ពីអតិថិជនគួរឲ្យកត់សម្គាល់ដែលកាលនោះក្រុមហ៊ុន ទទួលបានការកម្មង់ទិញជាង ៦០០០០ គ្រឿង។ រហូតមកទល់ពេលនេះ Fisker Inc បានសម្រេចចេញឡានអគ្គិសនីម៉ូដែលទី ៣ របស់ខ្លួននោះគឺ Fisker PEAR នេះឯង ក្នុងបំណង បង្ហាញមុខមាត់ (Branding) និងចាប់ទីផ្សារឡានអគ្គិសនី ឲ្យបានល្បី និងប្រកៀកប្រកិតគ្នា នឹង Tesla ជាពិសេស​សម្រាប់ទិផ្សារក្នុងសហរដ្ឋអាមេរិក។ 

តាមការចុះផ្សាយពី Medium បានឲ្យដឹងថា Fisker PEAR នេះ ត្រូវបានរចនាជាមួយរូបរាង ស្អាតសង្ហា ជាពិសេស តម្លៃទាបជាង Tesla ដល់ទៅជាង ១ មុឺនដុល្លារ ត្រឹមតែ ២៩ ៩៩០ ដុល្លារ ប៉ុណ្ណោះសម្រាប់តម្លៃចេញពីរោងចក្រ ដែលទាបជាង Hyundai Kona EV ដែលកំពុងតែពេញនិយមថាធូរថ្លៃនាពេលបច្ចុប្បន្ននេះ ទៀតផង។

មូលហេតុដែល Fisker PEAR លក់បានក្នុងតម្លៃទាប គេសន្និដ្ឋានថា ដោយសារតែ ដំណើរការការផលិតរថយន្ដ ចំណាយតិច ទី១ ការរចនាតួរថយន្ដទាំងមូលត្រូវបានធ្វើឡើងឲ្យមានទម្ងន់ស្រាល និងវត្ថុធាតុដើមតិច, ទី ២ Fisker Inc ធ្លាប់ជាដៃគូជាមួយក្រុមហ៊ុនផលិតថ្មឡានអគ្គិសនីល្បីឈ្មោះ CATL ក្នុងកាផលិតរថយន្ដ Ocean របស់ខ្លួន ហើយថ្មីៗនេះ CATL ក៏ទើបតែប្រកាសថា នឹងចេញថ្មអគ្គិសនីប្រភេទថ្មី sodium-ion battery នៅចុងឆ្នាំ ២០២៣ នេះ ដែលមានតម្លៃទាបជាងថ្ម​ lithuim-ion battery បច្ចុប្បន្នដែលឈរនៅ ១៣២ ដុល្លារ ក្នុងមួយគីឡូវ៉ាត់ម៉ោង ដោយថ្មថ្មីនេះ មានតម្លៃត្រឹមតែ ៧៧ ដុល្លារ ក្នុងមួយគីឡូវ៉ាត់ម៉ោង ប៉ុណ្ណោះ និងប៉ាន់ស្មានថាអាចធ្លាក់ដល់ ៤០ ដុល្លារ ទៀតផង ជាពិសេស វាមានសមត្ថភាពរត់បានឆ្ងាយជាងថ្មធម្មតាផងដែរ ដែលនេះ ជាកត្ដាអាចឲ្យ Fisker កាន់តែមានតម្លៃទាប អាចពង្រឹងទីផ្សាររបស់ខ្លួនកាន់តែខ្លាំង។  

រីឯសមត្ថភាពរបស់វា វិញ Fisker Inc សុំលាក់ទុកសិន ដោយបានបង្ហើបតែចំណុចមួយចំនួនប៉ុណ្ណោះដូចជា វាអាចរត់បានចម្ងាយ ៤០២ គម រាល់ពេលសាកពេញម្ដង សាកបានជាមួយថាមពល ២៥០ kW អាចឲ្យថ្មរថយន្ដ ឡើងបានពី ១០% ទៅ ៨០% ប្រើពេលតិចជាង ៣០ នាទី ។ 

គួរបញ្ជាក់ផងដែរសម្រាប់យុទ្ធសាស្រ្ដការផលិត និងចេញលក់ ដើម្បីប្រជែង​នឹង Tesla យ៉ាងណានោះមានតែ ចាំមើលបន្ដ តាមកម្លាំងប្រជាប្រិយភាពដែលវាទទួលបាន នៅពេលរថយន្ដជាផ្លូវការ នៅឆ្នាំ ២០២៤ ខាងមុខនេះ ។ 

ប្រភព៖ Medium 

អត្ថបទ៖ Andra