Rav4 ជាអម្បូរ Crossover SUV ដ៏ពេញនិយមរបស់ Toyota ហើយស្រុកខ្មែរបច្ចុប្បន្នក៏ឃើញមានប្រើច្រើនដែរ ជាទូទៅស៊េរីឆ្នាំ២០០១ ស្ថិតក្នុងជំនាន់ទី២ ជាមួយតម្លៃហាងឆេងនៅនឹងល្អគួរសមខ្ទង់ ១ម៉ឺនដុល្លារអីដែរ និងជំនាន់ទី ៣ ឆ្នាំ២០០៦ ខ្ទង់ ១ម៉ឺនដុល្លារក្រាស់ ទៅ ២ម៉ឺនដុល្លារអីដែរ។ 

ថ្ងៃនេះយើងមកជជែកគ្នាពីជំនាន់ទី៥ ស៊េរីឆ្នាំ២០២៤ ដែល Toyota ទើបបានចេញលក់មួយរយៈទៅហើយនៅទីផ្សារអាមេរិកជាមួយតម្លៃថ្មីខ្លាញ់គោចាប់ពី ២៨,៦៧៥ដុល្លារ ដល់ ៤០,០៣០ដុល្លារ អមជាមួយជម្រើស Trim/Option ចំនួន ដល់ទៅ ១៣ឯណោះ នឹងមានទាំងភេទសាំងសុទ្ធ ជាមួយកូនកាត់ Hybrid ។

ពពួកជំនាន់ទី ៥ ចាប់ពីឆ្នាំ២០១៩ ដល់២០២៤ ទាំងរូបរាងខាងក្រៅ បរិក្ខាខាងក្នុង និងកម្លាំងម៉ាស៊ីន ដូចជាមិនមិនទាន់មានការប្រែប្រួលធំឡើយ តែបន្ថែមជាមួយប្រព័ន្ធបច្ចេកវិទ្យាសុវត្ថិភាពជំនួយពេលបើក Toyota Safety Sense 2.5 ជាស្ដង់ដែរតែម្ដង។

សម្រាប់កម្លាំងម៉ាស៊ីន Rav4 នៅប្រើម៉ាស៊ីន ៤ស៊ីឡាំង ២.៥លីត្រដដែល ជាមួយកម្លាំង ២០៣សេះ កម្លាងរមួល ១៨៤ផោនហ្វីត ប្រើប្រអប់លេខ ៨វគ្គអូតូ ជំនួយដោយ Drive Mode និងមុខងារ Off-Road ជាមួយជម្រើសរត់ដោយប៉ុង១ FWD នឹងប៉ុង២ AWD មានមុខងារជំនួយប៉ុងឆ្លាតវ៉ៃ DVT  ដែលស៊ីសាំងចន្លោះពី ៧លីត្រ ទៅ ៩លីត្រក្នុង ១០០គីឡូម៉ែត្រ។

ចំណែកប្រភេទ Hybrid វិញ ផលិតកម្លាំងបាន ២១៩សេះ កម្លាំងរមួល ១៨៤ផោនហ្វីត ភ្ជាប់ជាមួយប្រអប់លេខ ECVT បង្វិលកង់ដោយប៉ុង២ ប្រភេទ Electronic on Demand AWD ជាមួយកម្រិតស៊ីសាំងជាមធ្យម ៦លីត្រក្នុង ១០០គីឡូម៉ែត្រ។

Rav4 2024 មានប្រវែងតួរខ្លួនសរុប ៤,៦០០ម.ម ទទឹង ១,៨៥៥ម.ម កម្ពស់ ១,៦៦០ម.ម ជាមួយទម្ងន់ ១,៦៤០គីឡូក្រាម។ 

ខាងក្នុងខុសប្លែកគ្នាច្រើនគួរសម អាស្រ័យទៅលើ Trim/Option និយាយរួមបើជា Trim ខ្ពស់ៗដូចជា៖ Limited វិញឃើញមានបំពាក់ភ្លើង Ambient Light ជាមួយកៅអីស្បែក ជំនួយដោយអេឡិចត្រនិច នឹង Memory Seat ជាមួយមុខងារក្ដៅត្រជាក់ មុខងារបញ្ជាឆេះពីចម្ងាយ កុងទ័រឌីជីថល អេក្រង់ថាច់ ១០.៥អ៉ីងភ្ជាប់ Apple CarPlay ជាមួយកាមេរ៉ា ៣៦០ឌឺក្រេ។

កញ្ចក់កាត់ចំណាំងផ្លាត់ ជាមួយកញ្ចក់មើលក្រោយបែបរឌីជីថល Speaker JBL ១១គ្រាប់ ដំបូលបើក ទ្វាគូទក្រោយអូតូ រន្ធ USB មុខក្រោយជាមួយ Wireless Charge រន្ធ USB-C ដំបូលបើកប្រភេទ Panoramic នឹងផ្នែកជាច្រើនស្រោបដោយស្បែក រំលេចជាមួយក្រូម នឹងមុខងារពិសេសៗមួយចំនួនទៀតផងដែរ៕

ដោយ៖ Bunsak

តោះ! ចូលរួមការងារជាមួយ Advan Auto ប្រសិនបើអ្នកស្រឡាញ់វិស័យរថយន្ត មិនចាំបាច់មានបទពិសោធន៍ក៏បាន អ្នកអាចមករៀនសូត្រពីការងារជាមួយពួកយើងឥឡូវនេះ ។

អ្នកផលិតមាតិកា/សរសេរអត្ថបទព័ត៌មាន - Content Creator/Writer (Intern)

អ្នកកាត់តវីដេអូ - Video Editor (Intern)

ដាក់ពាក្យមកកាន់ Telegram: https://t.me/advanauto_contact    

ទាញយកព័ត៌មានលម្អិត (Job Description) : https://shorturl.at/izBIW