ត្រកូល RX ជាឡានលំដាប់ជួរមុខមួយក្នុងចំណោមប្រភេទ Crossover SUV របស់ក្រុមហ៊ុន Lexus ហើយវាក៏ជារថយន្ដដែលល្បីនៅខាងបែកអ៊ឺរ៉ុប និងអាមេរិកជាដើម។ ដោយខ្មែរយើងនាំចូលឡានភាគច្រើនពីអាមេរិក វាក៏ធ្លាក់មកដល់កម្ពុជា​ក្នុងប្រភេទជាឡានមួយទឹក ដែលមានអាយុកាលជិត២០ឆ្នាំ តែតម្លៃនៅស្រុកខ្មែរវិញចង់ថ្លៃជាងកាលចេញពីរោងចក្រទៅទៀត។ សម្រាប់ទីផ្សារ RX330 ជំនាន់ទី២នេះ នៅកម្ពុជាបច្ចប្បន្នចន្លោះពី ២២០០០ដុល្លារជាង​ ទៅ៣០០០០ដុល្លារជាង អាស្រ័យលើឆ្នាំផលិត Option ពណ៌ និងប្រភេទស្លាកលេខ ឬក្រដាស់ពន្ធជាដើម។

បើទោះបីជា RX330 ទំនើបជិះស្រួល រត់ណឹងស្ងាត់ល្អក៏ដោយ វាជាឡានចាស់ឆ្នាំ អញ្ចឹងបញ្ហាមួយចំនួនតែងកើតមានឡើង ចំពោះបងប្អូនយើងតែងជួបប្រទះ ដែលតម្រូវឲ្យដឹគុណវិបត្តិ ៥ ចំណុច មុននឹងទិញជិះ ។ តែមុននិងចូលដល់សាច់រឿង សូមលើកយកពីលក្ខណៈទាក់ទាញរបស់ Lexus RX330 នេះបន្ដិចសិន។

Lexus RX330 បំពាក់ម៉ាស៊ីន ៦ស៊ីឡាំង ចំណុះ ៣.៣ លីត្រ ផលិតកម្លាំងបាន ២៣០សេះ កម្លាំងរមួល ២៣៨ផោនហ្វីត ល្បឿនលឿនបំផុត ​២២៥គីឡូម៉ែត្រ/ម៉ោង ជាន់ស្ទុះពី ០ ទៅ ១០០ម៉ែត្រប្រើពេល ៨.១វិនាទី។ ប្រើប្រអប់លេខ ៥ វគ្គអូតូ បង្វិលកង់ដោយប្រភេទប៉ុងមួយ (FWD) និងប៉ុងពីរ (AWD)។កម្រិតស៊ីសាំងកាលចេញពីរោចក្រកាលជិត២០ឆ្នាំមុន ក្នុងក្រុង ១៣លីត្រ និងក្រៅក្រុង ១០លីត្រ តែជាក់ស្ដែងបច្ចុប្បន្ននេះវិញ ហក់ចន្លោះពី ១៣លីត្រ ទៅ១៦លីត្រ ក្នុង១០០គីឡូម៉ែត្រ ឬអាចលើសខ្វះតិចតួចតាមស្ថានភាពជាក់ស្ដែង។

ប្រព័ន្ធជើងក្រោមបំពាក់ យ៉ានកង់១៨អីញ ហ្វ្រាំងគៀបមុខក្រោយ ជំនួយដោយ ABS និងដំណើរការដោយប្រព័ន្ធ ប៉ូមរឺស័រធម្មតា MacPherson Strut នៅផ្នែកខាងមុខ និងខាងក្រោយជា Multi-link ធ្វើអោយការបើកជ្រេនៅលើផ្លូវ កោងទប់លំនឹងបានល្អ ចំណែកឯការជិះលើផ្លូវលំបាកល្មៗក៏វាអត់សូវរលាក់ និងជួយកាត់បន្ថយសម្លេងរំខានពីខាងក្រៅ បានស្ងាត់ល្អ។

មកដល់រឿងយើងវិញ ចំពោះបញ្ហាអូសឡានចូលរោងចក្រ បើតាមរបាយការណ៍ពី Autoblog បានឲ្យដឹងថា RX330 មានរហូតដល់ទៅ ៦ដងឯណោះ។ ដោយភាគច្រើនមានបញ្ហាទៅលើប្រព័ន្ធភ្លើងស្ដុបខាងក្រោយ អត់ភ្លឺពេលជាន់ហ្វ្រាំង មិនលោតភ្លើងសញ្ញាក្រហម មូលហេតុនេះហើយបានជាគេចេះតែបុកគូទពីក្រោយ ។ក្រៅពីនេះវាមានបញ្ហាធំមួយទៀតគឺ លេចធ្លាយប្រេងចេញពីស៊ីឡាំងមេរបស់ប្រព័ន្ធហ្រ្វាំង (BRAKE MASTER CYLINDER) ដែលជាហេតុនាំឲ្យការជាន់ហ្វ្រាំងគ្មានប្រសិទ្ធភាព ដែលអាចបង្កជាគ្រោះថ្នាក់ដោយយថាហេតុ។

ចំពោះចំណុចអវិជ្ជមាន ចំនួន៥​ ដែលអ្នកប្រើសព្វថ្ងៃតែជួបប្រទះលើ RX330 ដូចជា៖

១.ជាឡានចាស់ឆ្នាំតែតម្លៃនៅខ្ពស់ ដែលថ្លៃស្មើនិងឡានថ្មី ស៊េរីឆ្នាំ២០២២មួយចំនួនទៅទៀត ។

២.ទិញថ្លៃ ហើយពេលលក់វិញខាតច្រើនលើសពី ៣០% ឬអាចលើសនេះ ទៅតាមកម្រិតគុណភាពជាក់ស្ដែង។

៣.កម្រិតស៊ីសាំងប្រែប្រួលច្រើនខុសពីធម្មតា និយាយរូមស៊ីខ្លាំងគួរសម។

៤.គ្រឿងបន្លាស់មិនពិបាកស្វែងរកទេ តែថ្លៃ ដែលចំណាយក្នុងការជួសជុលជាមធ្យមខ្ទង់ ជិត២០០ដុល្លារ ទៅ៥០០ដុល្លារជាង ដូចដែលយើងបានដឹងហើយថា គ្រឿងបន្លាស់របស់ Lexus ជាទូទៅថ្លៃជាងគ្រឿងបន្លាស់ Toyota បើទោះបីជាក្រុមហ៊ុនតែមួយក៏ពិតមែន ។

៥.គ្រឿងក្នុង ជាពិសេសនៅផ្នែកតាបឡូ ផុយស្រួយ និងឆាប់ចាញ់កម្ដៅ ចតចោលថ្ងៃក្ដៅយូរ អាចមានបញ្ហាងាយនឹងប្រេះ ដែលទាមទារឲ្យមានការថែមទាំខ្ពស់ជាដើម។

តែយ៉ាងណា វាជាឡានដែលពេញនិយមនៅឡើយ ព្រោះតែរូបរាងដ៏ទាក់ទាញ គួបផ្សំនិងបរិក្ខាខាងក្នុងស្រស់ស្អាតបែប Luxury តែតម្លៃគឺជារឿងមួយដែលបងប្អូនគួរពិចារណាដែរ។ ចំពោះបងប្អូនដែលស្រឡាញ់ និងមានបំណងចង់ប្រើប្រាស់វា ត្រូវដឹងចំណុចទាំងនេះសិនក៏មិនខាតអ្វីដែរ ជៀសវាងពេលប្រើហើយជួបបញ្ហាទៅបន្ទោសអ្នកលក់។

ម្យ៉ាងទៀតពេលទិញ គួរតែពិនិត្យឲ្យបានល្អិតល្អន់បន្ដិច ទាំងផ្នែកម៉ាស៊ីន សាច់ដែកទឹកថ្នាំ ជើងក្រោម និងគ្រឿងក្នុង តែបើប៉ះឡានស្អាត ប្រើទៅក៏មិនសូវជាធ្វើទុក្ខ និងជួបបញ្ហាអ្វីច្រើនដែរ៕

អត្ថបទ៖ BunSak