ត្រកូល RX ជំនាន់ទី ២ ក្នុងគ្រួសារ Lexus ដែលយើងស្គាល់ថាជា Lexus RX330 បានស្នងតំណែងពី RX300 ក្នុងគ្រួសារតែមួយ​ តែអាប្អូននេះរាងសង្ហារជាង ទំនើបជាងបន្ដិច។

វាកើតនៅឆ្នាំ ២០០៤ ដល់ ២០០៦ អាយុខ្លីតែល្បី និងពេញនិយមណាស់ វាជា ឡាន Crossover SUV ប្រណិត និងគុណភាពនៃការរចនាបទទាំងក្នុងនឹងក្រៅ បានទាក់ទាញចិត្តអតិថិជនច្រើនជាង RX300 ចំណែកឯម្លៃក៏រាងថ្លៃតាហ្នឹងដែរ។

តែយ៉ាងណាវាក៏មានរឿងអាស្រូវមួយចំនួន ដល់ថ្នាក់ Lexus បានអូស RX330 ចូលរោងចក្រវិញច្រើនដងដែរ តែឥឡូវសូមបង្ហាញសមត្ថភាពវាបន្តិច មុននិយាយពីបញ្ហារបស់វា ។

• Lexus RX330 បំពាក់ម៉ាស៊ីន ៦ស៊ីឡាំង ចំណុះ ៣.៣ លីត្រ ផលិតកម្លាំងបាន ២៣០សេះ កម្លាំងរមួល ២៣៨ផោនហ្វីត ល្បឿនលឿនបំផុត ​២២៥គីឡូម៉ែត្រ/ម៉ោង ជាន់ស្ទុះពី ០ ទៅ ១០០ម៉ែត្រប្រើពេល ៨.១វិនាទី។ ប្រើប្រអប់លេខ ៥ វគ្គអូតូ បង្វិលកង់ដោយប្រភេទប៉ុងមួយ (FWD) និងប៉ុងពីរ (AWD)។

កម្រិតស៊ីសាំងវិញ ក្នុងក្រុង ១៣លីត្រ និងក្រៅក្រុង ១០លីត្រ អាចតិចឬច្រើនជាងនេះទៅតាមការបើកបរជាក់់ស្ដែង។

ប្រព័ន្ធជើងក្រោមបំពាក់ យ៉ានកង់់ ១៨អីញ ហ្វ្រាំងគៀបមុខក្រោយ ជំនួយដោយ ABS នៅផ្នែកខាងមុខប្រើប៉ូម និងសុឺស៊រធម្មតា MacPherson Strut និងខាងក្រោយជា Multi-link ធ្វើអោយការបើកជ្រេនៅផ្លូវ កោងទប់លំនឹងបានល្អ ចំណែកឯការជិះលើផ្លូវលំបាកល្មៗក៏វាអត់សូវរលាក់ និងជួយកាត់បន្ថយសម្លេងរំខានពីខាងក្រៅ បានស្ងាត់ល្អ។ 

និយាយពីខាងក្រៅវិញ វាជាទម្រង់ RX300 ចឹងមើលទៅរាងស្រដៀងដែរ គ្រាន់តែកែគូទត្រគៀគក្រោយអោយស្រួចជាងមុន និងតចង្ការអោយមានរាងវី(V) បន្ដិចមើលទៅឃើញស្អាតម៉្យាងដែរ។ បើជាប្រភេទ Full Option វិញ ចង្កៀងមុខប្រភេទ គុជ និងឃើញមានទឹកបាញ់ចង្កៀងផងដែរ។ 

ខាងក្នុងស្អាតប្លែក ការដេគ័រមានភាពទាន់សម័យ មានអេក្រង់ LCD កៅអីស្បែកអេឡិចត្រូនិក ការតុបតែងស្បែកលាយឈើនៅផ្នែកខ្លះ អោយមើលទៅស្រស់ប្រណិត។ វាមានកៅអី ២ ជួរធំទូលាយល្មម និងសល់ឃ្លុបក្រោយ អាចដាក់ឥវ៉ានបានច្រើនគួរសម ឬអាចអោយក្មេងៗជិះ ២-៣នាក់អីអត់ជាបញ្ហាទេ។  

បើនិយាយពីតេស្ដប៉ុកប៉ះវិញ RX330 ទទួលបានផ្កាយ៥ ពីនាយកដ្ឋានសុវត្ថិភាពចរាចរណ៍ផ្លូវគោគអាមេរិក ដោយពោងសុវត្ថិភាព ​៨គ្រាប់ ការពារបានគ្រប់គ្រាន់ទាំងផ្នែកខាងមុខ និងចំហៀង។

• មកដល់រឿងយើងវិញ ចំពោះបញ្ហាអូសឡានចូលរោងចក្រ បើតាមរបាយការណ៍ពី Autoblogបានអោយដឹងថា RX330 មានរហូតដល់ទៅ ៦ដងឯណោះ។ ដោយភាគច្រើនមានបញ្ហាទៅលើប្រព័ន្ធភ្លើង ស្ដុបខាងក្រោយអត់ភ្លឺពេលជាន់ហ្វ្រាំង មិនលោតភ្លើងសញ្ញាក្រហម មូលហេតុនេះហើយបានជាគេចេះតែបុកគូទពីក្រោយ ។

ក្រៅពីនេះវាមានបញ្ហាធំមួយទៀតគឺ លេចធ្លាយប្រេងចេញពីស៊ីឡាំងប្រព័ន្ធហ្រ្វាំង (BRAKE MASTER CYLINDER) ដែលជាហេតុនាំឲ្យការជាន់ហ្រ្វាំងគ្មានប្រសិទ្ធភាព បង្កជាគ្រោះថ្នាក់ដោយយថាហេតុ ។

វាក៏មានបញ្ហាខ្លះដែរ ទាក់ទងនឹងតាបឡូខាងក្នុងវាចាញ់កម្ដៅងាយនឹងប្រេះ គួរសមនឹងស្រុកយើងជាប្រទេសដែលក្ដៅស្រាប់ផង អាចថាជាចំណុចខ្សោយ ។ ដូច្នេះពេលទិញត្រូវពិនិត្យមើលអោយបានច្បាស់ដែរ បើប្រើក៏គួរការពារដោយមាន ក្រណាត់កំរាលក្រាលលើតាបឡូ និងកុំឧស្សាហ៍ចតហាលថ្ងៃក្ដៅពេក។

សរុបមកប្រហែលជាមានបងប្អូនខ្លះ ក៏ធ្លាប់កើតមានបញ្ហាអស់នេះដែរ អាចចូលរួមចែករំលែកបទពិសោធន៍បាន។ អត្ថបទក្រោយ Advan Auto នឹងសម្រាយលម្អិតអំពី Option នីមួយៗរបស់ RX330 ថាតើវាមានអ្វីខ្លះ​? ហើយទីផ្សារនៅកម្ពុជាគេនិយម Option អ្វី? តម្លៃខុសគ្នាដូចម្ដេច ដើម្បីអោយបងប្អូនស្រួល សម្រេចចិត្តថាត្រូវប្រើ Option ឬជម្រើសមួយណា?

អត្ថបទ៖ BunSak