Sienna គឺជាឡានប្រភេទ MiniVan ៧ កៅអី ត្រូវបាន Toyota បញ្ចេញមុខដំបូង នៅឆ្នាំ ១៩៩៨ រហូតមកដល់ឆ្នាំ ២០២២ នេះ បើគិតពីដំណើរការផលិតវិញ មកទល់ពេលនេះវាមាន ៤ ជំនាន់ទៅហើយ។ 

ក្នុងនោះយើងឃើញមានភាគច្រើននៅកម្ពុជាយើង​ ពីជំនាន់ទី ១ ដល់ទី ៣ ដែលជាប្រភេទឡានសម្រាប់ដឹកអ្នកកដំណើរ និងប្រើលក្ខណៈគ្រួសារ។ នៅលើដងផ្លូវកម្ពុជា ជំនាន់ទី១ សេរីឆ្នាំ ៩៨ ដល់០៣ កំពុងក្លាយជាឡានតាក់ស៊ីដ៏ពេញនិយមមួយសម្រាប់រត់ឆ្លងខេត្ត ឯជំនាន់ទី២ វិញពីឆ្នាំ ២០០៤ ដល់ ២០០៦ ។ រូបរាងខាងក្រៅសាមញ្ញ តែខាងក្នុងអេមគ្រាន់បើដែរ កម្លាំងម៉ាស៊ីនមិនធម្មតា តម្លៃក្នុងទីផ្សារសមល្មមអាចទទួលយកបាន ។

១.Toyota Sienna បំពាក់ម៉ាស៊ីន ៦ ស៊ីឡាំង ដំរៀបជារាងអក្សរ V មុខកាត់ ៣.៣លីត្រ ផលិតកម្លាំងបាន ២៣០ សេះ កម្លាំងរមួល ២៤២ ផោនហ្វីត ប្រើប្រអប់លេខ ៥វគ្គអូតូ ល្បឿនអតិបរិមា ២២៥ គីឡូម៉ែត្រ/ម៉ោង ជាន់ស្ទុះពី ០ ទៅ ១០០គីឡូម៉ែត្រ/ម៉ោង ប្រើពេល ៨.៨ វិនាទី បង្វិលកង់ដោយប្រភេទប៉ុង១(FWD) និងមានជម្រើសប៉ុង២(AWD)។

កម្រិតស៊ីសាំងវិញជាមធ្យម ១២លីត្រ សម្រាប់ក្នុងក្រុង ១៣លីត្រ និងក្រៅក្នុង ៩លីត្រក្នុង ១០០គីឡូម៉ែត្រ។

២.ជើងក្រោម បំពាក់ប្រព័ន្ធឯករាជ្យ (Independent Suspension) នៅផ្នែកខាងមុខ និងខាងក្រោយជាប្រភេទ បូមរ៉ឺស័រប្រភេទ Torsion Beam ដែលបំបែកបូមនិងរឺស័រផ្សេងគ្នា ជួយសម្រួលលើការទប់លំនឹងពេលបើកលឿន តែអាចនឹងរលាក់បន្តិច នៅពេលចូលគ្រលុក ឬឡើងទួល ។ 

វាបន្ថយល្បឿនដោយប្រើហ្វ្រាំងឌីសគៀបនៅកង់ខាងមុខ និងខាងក្រោយ ជំនួយដោយប្រព័ន្ធ ABS លើកង់ទាំងបួនតែម្ដង។

៣.ខាងក្រៅមើលទៅសាមញ្ញ តែរាងវែងបន្ដិចព្រោះវាជាប្រភេទឡាន Van វាមានប្រវែង ៥០៨០ ម.ម ទទឹង ១៩៧០ ម.ម កម្ពស់ ១៧៥០ម.ម ទម្ងន់រហូតដល់ ២ តោនឯណោះ។

៤.បើផ្នែកខាងក្នុងវិញទូលាយដែរ វាមានកៅអី ៣ ជួរដាច់ពីគ្នាអាចជិះបានគ្នា ៨នាក់ ងាយស្រួលចេញចូល ជាពិសេសមានទ្វាសងខាង (ងាយស្រួលដាក់ម៉ូយតាមផ្លូវសម្រាប់អ្នករត់តាក់ស៊ី) និងខាងក្រោយមានប៊ុតុងចុចដើម្បីបិទបើកអូតូ វាក៏មានម៉ាស៊ីនត្រជាក់ ៨ប្រឡោះផងដែរ ។

ចំពោះប្រភេទ XLE Limited វិញមានដូចជា ៖ កៅអីស្បែកបញ្ជារដោយប៊ូតុងអេឡិចត្រូនិក មានកៅអីកម្តៅ  ហ្វរមីកាឈឺ អេក្រង់ ៨ អីញ ភ្ជាប់ Bluetooth ​និង Volume ដៃចង្កូត, កាមេរ៉ាមើលក្រោយ និងសេនស៊រជំនួយពេលចូលចត Speaker ១០ គ្រាប់ JBL ពោងសុវត្ថិភាព ៩ គ្រាប់ DVD សម្រាប់កៅអីអ្នកដំណើរ ដំបូលបើក រន្ធសាកថ្ម ១២ វ៉ុល ចំនួន៣ មានពិលកាង មានហ្វ្រាំងគៀបទាំងមុខក្រោយ ជំនួយដោយ ABS នៃកង់ទាំងបួនជាដើម។

៥.ចំពោះប្រព័ន្ធសុវត្ថិភាពវិញ Toyota Sienna ជំនាន់ទី២ ទទួលបានការវាយតម្លៃពិន្ទុផ្កាយ ៥ ពីនាយកដ្ឋសុវត្ថិភាពចរាចរណ៍អាមេរិច។ ដោយពោងសុវត្ថិភាពទាំង ៩ គ្រាប់ ការពារបានយ៉ាងគ្រប់គ្រាន់ទាំងពីរមុខនិងចំហៀង។

បច្ចុប្បន្នតម្លៃវានៅគ្រាន់បើដែរ ចន្លោះពី ១ ម៉ឺនដុល្លារក្រាស់ ទៅ ២ ម៉ឺនដុល្លារស្តើង អាស្រ័យលើ ប្រភេទ Option ឆ្នាំផលិត ពណ៌ និងភិនភាគជាក់ស្ដែងជាដើម ។

សូមបញ្ជាក់ថា Toyota Sienna មានបែងចែកជា ៤ Trims​ ឬ Option ប្រភេទ៖ CE, LE, XLE, និង XLE Limited ។ ស្រុកយើងភាគច្រើនប្រើប្រភេទ LE, XLE និង ប្រភេទទំនើបជាងគេគឺ XLE Limited នេះឯង។   

ជារួមសម្រាប់បងប្អូនដែលធ្វើការជាក្រុមការងារ ឬគ្រួសារដែលមានសមាជិកច្រើន មានក្មេងៗកូនតូចជាដើម Sienna អាចជាជម្រើសមួយសម្រាប់ពិចារណាលើវាបាន។ កម្រិតស៊ីសាំងប៉ុណ្ណឹង ល្បឿនកម្លាំងម៉ាស៊ីន ប្រព័ន្ធជើងក្រោម​ ខាងក្នុងទូលាយគួរសម បូករួមទាំងទម្ងន់ដ៏ធ្ងន់ផងនោះ តម្លៃប៉ុណ្ណឹងអាចថាសាកសម សម្រាប់យកទៅប្រើប្រាស់បាន។ 

 អត្ថបទ៖ BunSak